توشہ خانہ کا نیا کیس، عمران خان اور بشریٰ بی بی کے جوڈیشل ریمانڈ میں 16 ستمبر تک توسیع

نئے توشہ کیس میں بانی پی ٹی آئی عمران خان اور بشریٰ بی بی کےجوڈیشل ریمانڈ میں 16 ستمبر تک توسیع کر دی گئی۔ احتساب عدالت دونوں ملزمان کی ضمانت بعد از گرفتاری کی درخواستوں پر 6 ستمبر کو سماعت کرے گی۔

نئے توشہ خانہ ریفرنس کی اڈیالہ جیل میں سماعت کے موقع پر بانی پی ٹی آئی اور بشریٰ بی بی کو کمرہ عدالت پیش کیا گیا، دوران سماعت فریقین کے وکلاء نے دلائل دیتے ہوئے موقف اختیار کیا کہ توشہ خانہ کا نیا ریفرنس پہلے ریفرنس جیسا ہی ہے، ایک ہی طرح کے الزام میں دو ریفرنس نہیں بنائے جاسکتے۔

اس موقع پر نیب پراسیکیوٹر نےکہا کہ دستاویزات سے ہی ثابت ہوسکتا ہے کہ نیا ریفرنس پہلے ریفرنس سے مشابہت رکھتا ہے یا نہیں۔ نیب پراسیکیوٹر نے توشہ خانہ کے پرانے ریفرنس کے جوڈیشل ریکارڈ کی طلبی کیلئے درخواست دائر کر دی، عدالت نے فریقین کے دلائل سننے کے بعد نیب کی جوڈیشل ریکارڈ طلب کرنے کی درخواست مسترد کردی۔

ریفرنس پرسماعت احتساب عدالت کے جج ناصر جاوید رانا نے اڈیالہ جیل میں کی۔ بانی پی ٹی آئی اور بشریٰ بی بی کے وکیل سلمان صفدر، انتظار پنجوتھہ اور خالد یوسف چودھری جبکہ نیب کے پراسیکیوٹر جنرل سردار مظفر عباسی،عمیر مجید عدالت میں پیش ہوئے۔