یوکرین کا ڈیم ٹوٹنے کے بعد 30 آبادیاں زیرآب، تیرتی بارودی سرنگیں ڈراؤنا خواب بن گئیں

جنوبی یوکرین میں جنگ کے دوران ٹوٹنے والے بڑے ڈیم کاخوفکا کے پانی سے 30 آبادیاں ڈوب گئی ہیں اورجنگ کے دوران بچھائی گئی بارودی سرنگیں عام شہریوں کے لیے سب سے بڑا خطرہ بن گئی ہیں جو پانی میں تیر رہی ہیں۔

کاخوفکا ڈیم ٹوٹنے کے بعد ہزاروں شہریوں کو پینے کا پانی بھی دستیاب نہیں، یوکرین کی فوج آبادیوں پر ڈرونز کے ذریعے پینے کے پانی کی بوتلیں پھینک رہی ہے۔

کیف اور ماسکو دونوں ایک دوسرے کو ڈیم کی تباہی کا ذمہ دار قرار دے رہے ہیں، ڈیم ٹوٹنے کے بعد علاقے پر دوبارہ کنٹرول کے لیے یوکرین کا جوابی حملہ ملتوی ہوگیا ہے۔

ریڈ کراس نے خبردار کیا ہے کہ ڈیم ٹوٹنے کے بعد علاقے میں بچھائی گئی بارودی سرنگیں اب تلاش کرنا انتہائی مشکل ہو گیا ہے،ریڈ کراس حکام کا کہنا ہے کہ ڈیم ٹوٹنے سے پہلے علم تھا کہ خطرہ کہاں ہے، اب ہمیں نہیں معلوم کہ خطرہ کہاں کہاں ہے، اب صرف اتنا معلوم سے ہے کہ بارودی سرنگیں پانی کے ساتھ بہہ رہی ہیں۔

یوکرین کی فوج کے ترجمان کا کہنا ہے کہ بارودی سرنگیں اور تیرتی سرنگیں بن چکی ہیں جو بہت بڑا خطرہ ہیں، کسی بھی مقام پر یہ بارودی سرنگ اگر ملبے سے ٹکراتی ہے تو خود بخود پھٹ جائے گی۔