کم عمر ڈرائیورز کے خلاف کریک ڈاؤن، گاڑیاں اور موٹرسائیکل بند کرنے کا حکم

وزیراعلی پنجاب محسن نقوی نے کم عمر ڈرائیورز کیخلاف کریک ڈاؤن تیزکرنے کا حکم دیا ہے۔

وزیراعلی محسن نقوی نے ہدایت کی ہے کہ بغیر لائسنس  گاڑیاں اور موٹر سائیکل چلانے والے کم عمر ڈرائیوروں کے خلاف بلاامتیاز کارروائی کی جائے۔

وزیر اعلی محسن نقوی نے یہ ہدایات انسپکٹر جنرل پولیس۔ سی سی پی او لاہور اور تمام آر پی اوز کو ہدایات جاری کیں۔لاہور سمیت پنجاب بھر میں کم عمر ڈرائیورز کے خلاف کارروائی کی روزانہ کی بنیاد پر رپورٹ پیش کرنے کی بھی ہدایت کی گئی ہے۔

وزیراعلیٰ محسن نقوی نے کہا کہ کم عمر ڈرائیورنہ صرف اپنے لئے بلکہ دوسروں کے لئے بھی خطرات کا سبب بنتے ہیں،کم عمرڈرائیوروں کی گاڑیاں اور موٹر سائیکل بھی بند کئے جائیں۔

محسن نقوی نے اپیل کی کہ والدین کم عمر بچوں کو گاڑیاں اور موٹر سائیکل چلانے کی اجازت نہ دیں۔ہر زندگی  قیمتی ہے،کم سن ڈرائیور کی ذرا سے غلطی کسی کے لئے جان لیوا ثابت ہو سکتی ہے۔