اسلام آباد ایئرپورٹ عملے نے 15 لاکھ کا گمشدہ سامان تلاش کر کے خاتون کو لوٹا دیا

سول ایوی ایشن اسلام آباد ائیرپورٹ اسٹاف نے بین الاقوامی پرواز کے ذریعے پاکستان آنے والی خاتون کا کھویا ہوا 15لاکھ روپے مالیت کا سامان تلاش  کرکے واپس لوٹادیا۔

ترجمان سول ایوی ایشن اتھارٹی کے مطابق اسلام آباد کے بین الاقوامی ہوائی اڈے پرتعینات ائیرپورٹ عملے نے خاتون مسافر کا کھویا ہوا سامان برآمد کرکے (سونا، کرنسی اور دیگر اشیا) لوٹا دی گئیں، خاتون نے پارکنگ نمبر 12 میں ہینڈ بیگ بھولنے/گم ہونے کی شکایت درج کرائی تھی۔

گمشدہ سامان میں سونے کے سیٹ کے زیورات (06 تولے)، 1100 یو کے پاؤنڈز وغیرہ شامل تھے۔ مذکورہ مسافر مانچسٹر سے اتحاد ایئرویز کی پرواز سے اسلام آباد پہنچی تھی۔ شکایت سیل نے سی سی ٹی وی فوٹیج کے ذریعے پارکنگ سے بیگ اٹھانے والے مسافر کا پتہ چلایا۔

بیگ اٹھانے والا مانسہرہ کا رہائشی مسافر الصبح عمرہ فلائیٹ سے جدہ سے اسلام آباد پہنچا تھا،سی اے اے ویجلنس اسٹاف کے رابطہ کرنے پر مسافر نے تقریبا 15لاکھ روپے مالیت کی اشیا ایئرپورٹ پہنچا دیں،ائرپورٹ پر خاتون مسافر کو ان کے شوہر کی موجودگی میں سامان واپس کردیا گیا، سامان وصول کرتے ہوئے شوہر نے ائرپورٹ انتظامیہ کا شکریہ ادا کیا اور ان کی کوششوں کی تعریف کی۔