جماعت اسلامی نے راولپنڈی اور اسلام آباد میں مختلف مقامات پر دھرنا دے دیا، مذاکرات کے لیے تیار ہیں، وفاقی وزیر اطلاعات

اسلام آباد اور راولپنڈی کے مختلف مقامات پر دھرنے دینے کے اعلان کے بعد جماعت اسلامی نے جڑواں شہروں کے 4 مقامات پر دھرنا دے دیا۔حکومت نے جماعت اسلامی کو مذاکرات کی دعوت دے دی۔

مہنگی بجلی اور ٹیکسوں کے خلاف جماعت اسلامی نے مری روڈ راولپنڈی، زیرو پوائنٹ اسلام آباد، چونگی نمبر 26، جبکہ راولپنڈی میں لیاقت باغ کے باہر دھرنا دے دیا۔

امیر جماعت اسلامی حافظ نعیم الرحمان جماعت اسلامی کے دھرنے میں شریک ہیں، وہ چونگی نمبر 26 پر دھرنے کی قیادت کر رہے ہیں۔

اسلام آباد پولیس نے ڈی چوک کو سیل کردیا اور پارلیمنٹ ہاؤس جانے والے راستے بند کردیے، جماعت اسلامی کے کارکنوں کی پکڑ دھکڑ جاری ہے۔

پولیس حکام کا کہنا ہے کہ ریڈ زون حساس علاقہ ہے، کسی کو احتجاج کی اجازت نہیں ہے۔

اسلام آباد کے مختلف علاقوں سے جماعت اسلامی کے متعدد کارکنوں حراست میں لے لیا گیا ہے۔

امیر جماعت اسلامی راولپنڈی کا کہنا ہے کہ ہمارے کارکنوں کو گرفتار کیا گیا، راستے بند کر دیے گئے، مطالبات کی منظوری تک دھرنا جاری رہے گا۔

وفاقی وزیر اطلاعات عطا تارڑ نے کہا حکومت جماعت اسلامی سے مذاکرات کرنے کو تیار ہے، جماعت اسلامی کو لیاقت باغ میں جلسہ یا دھرنے کی اجازت دی گئی تھی۔

ان کا کہنا تھا کہ جماعت اسلامی کی اسلام آباد کی جانب پیش قدمی سمجھ نہیں آتی، حکومت مذاکراتی ٹیم تشکیل دینےکیلئے تیار ہے، جماعت اسلامی کےساتھ بیٹھ کربات کرسکتےہیں۔