پارٹی عہدوں کے لیے نواز شریف نے نام طلب کر لیے، سعد رفیق سیکرٹری جنرل کے لیے مضبوط امیدوار

نواز شریف نے پارٹی عہدوں میں تبدیلی کے لیے پارٹی کے مخلص اور دیرینہ رہنماؤں کے نام طلب کر لیے،ذرائع کا کہنا ہے کہ پارٹی عہدوں کے لیے تین تین نام پارٹی صدر کو پیش کیے جائیں گے ،مشکل وقت میں ثابت قدم رہنے اور الیکشن میں بہترین کردار ادا کرنے والوں کو پارٹی عہدے دئے جانے کا فیصلہ کیا گیا ہے۔

مسلم لیگ ن کے ذرائع کا کہنا ہے کہ مسلم لیگ ن کےسیکرٹری جنرل اور صوبائی عہدے داران سمیت ضلعی صدور کی تبدیلی کا بھی امکان  ہے۔خواجہ سعد رفیق سیکرٹری جنرل کے عہدے کے لئے مضبوط امیدوار ہیں۔

ذرائع نے بتایا کہ پارٹی کو متحرک کرنے اور غیر فعال قیادت کو ہٹانے کےلیے بلاتفریق کارروائی ہوگی،وفاقی اور صوبائی حکومت میں شامل چند وزراءسے تنظیمی ذمہ داریاں واپس لئے جانے کا امکان ہے۔

نواز شریف تنظیم سازی کے لئے چاروں صوبوں کے دورے بھی کریں گے، نواز شریف نے سندھ میں خراب کارگردگی اور عوامی رابطے سے دوری کی وجوہات پر رپورٹ طلب کی ہے۔