پاک فوج کے خلاف منظم مہم چلائی جا رہی ہے، حکومت اے پی سی بلائے، ایکس سروس مین سوسائٹی

صدر ایکس سروس مین سوسائٹی لفٹیننٹ جنرل ریٹائرڈ عبد القیوم کا کہنا ہے کہ بنوں میں انتشار پھیلانے والوں کیخلاف سخت ترین ایکشن ہونا چاہیئے۔ فیک نیوز پھیلا کر لوگوں کو گمراہ کیا گیا۔ ہماری اپیل ہے ملٹری لیڈر شپ سمیت تمام لوگ اکھٹے بیٹھیں۔ موجودہ صورتحال پر حکومت جلد از جلد آل پارٹیز کانفرنس بلائے۔ پوری قوم کی مدد ہوگی تو سپہ سالار بھی قوم کو مایوس نہیں کرینگے۔ ملک میں کوئی مارشل لاء نہیں رول آف لاء ہے، پارلیمنٹ ہے اور عدالتیں بھی اپنا کام کر رہی ہیں ۔

ریٹائرڈ فوجیوں کی نمائندہ تنظیم ایکس سروس مین سوسائٹی کے صدر لیفٹننٹ جنرل ر عبدالقیوم کا راولپنڈی پریس کلب میں میڈیا سے خطاب میں مزید کہنا تھا کہ جو لوگ نشانہ لگا کر پاک فوج پر اٹیک کرتے ہیں اس کا مقصد پاکستان کو کمزور کرنا اور سی پیک کو روکنا ہے، اِن سب باتوں سے بالا تر ہو کے ہمیں افغان گورمنٹ سے بات کرنی چاہیئے، ہمارے سارے پڑوسی ممالک کے ساتھ اچھے تعلق ہونے چاہئیں، ٹی ٹی پی والے امریکی اسلحے سے پاکستان کی چیک پوسٹوں پر حملے کر رہے ہیں،امریکہ 7 ارب ارب ڈالر کا اسلحہ چھوڑ کرافغانستان سے چلا گیا،پاکستان میں دہشتگردی کے واقعات میں اضافہ ہو رہا ہے۔

جنرل ریٹائرڈ عبدالقیوم نے کہا کہ صرف رواں سال 2024 میں ہمارے شہداء کی تعداد 575 ہے۔عالمی رپورٹ کے مطابق دنیا کے دس ممالک ہیں جن کو دہشتگردی کا خطرہ ہے اس کے مطابق پاکستان چوتھے اور بھارت 14ویں نمبر پر ہے۔ امریکی انخلاء کے بعد ہمارے آنگن میں 40 لاکھ پناہ گزین بیٹھے ہیں۔عزم استحکام کیخلاف خیبرپختونخوا اسمبلی سے قرار داد کی منظوری افسوسناک ہے۔امریکہ، افغانستان سے جاکر ہمارے لیئے یہاں دہشتگردوں کو چھوڑ گیا ہے۔ کے پی کے وزیر اعلیٰ نے بنوں حملے کی وضاحت کی جبکہ دشمن کے ایجنڈے پر ملک میں انتشار پھیلایا جا رہا ہے۔

انہوں نے کہا کہ ہم حکومت سے اپیل کرتے ہیں شہداء کی کم از کم پینشن 37 ہزار ہو۔ قوم سے اپیل ہے پارٹیوں جماعتوں سے نکل کر سب کے لیئے سوچیں۔ آئین اور قانون کی حدود میں رہ کر سب کچھ ہونا چاہیے۔ بانی پی ٹی آئی نے کور کمانڈر کے گھر جانے کا بھی کہا ذمہ دار لیڈر شپ کو ایسی باتیں زیب نہیں دیتیں۔ اپوزیشن لیڈر اور اسد قیصر کے جلوس میں ادارے کو برا بھلا کہا گیا۔