تحریک انصاف کے رہنما زلفی بخاری نے کہا ہے کہ جو کوئی بھی سابق وزیر اعظم عمران خان یا تحریک انصاف کے نام پر امداد جمع کرنے کی کوشش کرے گا اس کے خلاف پارٹی قانونی کارروائی کرے گی۔
ٹوئٹر پر پیغام میں زلفی بخاری نے کہا کہ عمران خان اور پی ٹی آئی کے قانونی اخراجات کے نام پر چندہ جمع کرنے والی ایک تنظیم ہیومن رائٹس لیگل ایڈ فاؤنڈیشن (ایچ آر ایل اے ایف) اور اس کی فنڈ ریزنگ کا جماعت سے کوئی تعلق نہیں ہے۔
Let me make it categorically CLEAR! Nor Imran Khan or PTI has ever instructed or appointed any legal team so far. Nor does ANYONE have any mandate from him or the party. PTI has absolutely nothing to do with this organisation or fundraising linked to it. Whoever tries to raise… pic.twitter.com/UCXWKf3S83
— Sayed Z Bukhari (@sayedzbukhari) August 18, 2023
انھوں نے کہا کہ ’عمران خان یا پی ٹی آئی نے ایسی کسی قانونی ٹیم کو ہدایت دی نہ انھیں تعینات کیا۔ ان (عمران خان) یا پارٹی کی طرف سے اس کا کسی کو بھی حق نہیں دیا گیا۔
رہنما پی ٹی آئی نے کہا کہ سب کو ان جعلی کوششوں اور خود اعلانیہ لیگل ٹیمز کے بارے میں محتاط رہنا چاہیے۔
خیال رہے کہ ایچ آر ایل اے ایف نے دعویٰ کیا تھا کہ سابق وزیر اعظم عمران خان نے ’لندن میں انسانی حقوق کے وکلا کو آزادی کے لیے قانونی جنگ لڑنے کی ہدایت کی ہے۔‘
اس نے یہ بھی دعویٰ کیا کہ تحریک انصاف کی طرف سے ایچ آر ایل اے ایف کو اقوام متحدہ سمیت عالمی تنظیموں کے سامنے درخواستیں دائر کرنے کی ہدایت دی گئی ہے۔ اس نے ’پاکستان لیگل فنڈ‘ کے لیے ’ایک ملین پاؤنڈ‘ جمع کرنے کا ارادہ ظاہر کیا ہے۔
