لاہور ہائیکورٹ نے جناح ہائوس حملہ میں ملوث پی ٹی آئی رہنماء عالیہ حمزہ، خدیجہ شاہ سمیت دیگر ملزمان کی ضمانت کی درخواستوں میں خواتین ملزمان کی درخواستیں یکجا کرکے 21 اگست کو سماعت کیلئے پیش کرنے کا حکم دے دیا۔
عدالت نے مرد ملزموں کی ضمانت کی درخواستوں پر سماعت غیر معینہ مدت کیلئے ملتوی کردی۔
لاہور ہائیکورٹ کے جسٹس سلطان تنویر احمد کی سربراہی میں دو رکنی بنچ نے درخواستوں پر سماعت کی، درخواست گزاروں نصراللہ ودیگر کی طرف سے عثمان سرور ایڈووکیٹ پیش ہوئے۔
درخواستوں میں موقف اختیار کیا گیا کہ درخواست گزاروں کی شناخت پریڈ میں قانونی تقاضے پورے نہیں کیے گئے، واقعہ میں کوئی سرکاری اہلکار زخمی نہ ہونے پر انسداد دہشت گردی دفعات کا اطلاق نہیں ہوتا، ماتحت عدالت نے قانونی تقاضوں کے برعکس ضمانت کی درخواستیں خارج کیں۔