چیئرمین پی ٹی آئی عمران خان کی اہلیہ بشری بی بی نے کیسز کی تفصیلات کیلئے لاہور ہائیکورٹ سے رجوع کرلیا،عدالت نے درخواست پر وفاقی حکومت سمیت فریقین کو 20 نومبر کیلئے نوٹس جاری کر دیئے۔
جسٹس شہرام سرور چوہدری کی سربراہی میں دو رکنی بنچ بشری بی بی کی درخواست پر سماعت کی۔
بشریٰ بی بی کی درخواست میں وفاقی حکومت، صوبائی حکومت کو فریق بنایا گیا ہے۔ درخواست میں نیب، آئی جی پنجاب، انٹی کرپشن سمیت دیگر کو فریق بنایا گیا ہے۔
درخواست میں موقف اختیار کیا گیا ہے کہ درخواست گزار کیخلاف شوہر کو وزارت اعظمی سے ہٹانے سے قبل کوئی کیس نہیں تھا،عمران خان کو عہدے سے ہٹانے کے بعد سیاسی انتقام کا نشانہ بنایا جا رہا ہے،درخواست گزار کو آئے روز کسی نئے کیس میں طلب کرلیا جاتا ہے،درخواست گزار کو کیسز کی تفصیلات فراہم نہیں کی جارہی،معلوم نہیں درخواست گزار کیخلاف کتنی انکوائریاں، کیسز درج ہیں۔
درخواست گزار نے استدعا کی کہ عدالت غیر قانونی کیسز، انکوائریز کالعدم قرار دی جائیں،عدالت انکوائریز، ایف آئی آرز، تحقیقات کی تفصیلات فراہم کرنے کا حکم دے،عدالت نامعلوم کیسز، انکوائریز میں گرفتار کرنے سے روکنے کا حکم دے۔