ائرپورٹس سیکورٹی فورس نے ملتان،اسلام آباداور پشاورکے ہوائی اڈوں پرکارروائیوں کے دوران 4 کلوگرام سے زائد ہیروئن قبضے میں لے لی۔
ترجمان اے ایس ایف کے مطابق عملے نے ملتان سے دوحہ جانے والے مسافر سے 1.170 کلو گرام آئس ہیروئن،اسلام آباد سے دوحہ جانے والے مسافر سے 810 گرام جبکہ پشاور سے دوحہ جانے والے مسافر سے 2.73 کلو گرام آئس ہیروئن برآمد کرلی،مسافر محمد ابرار نے ملتان ایئرپورٹ پر ہیروئن بیگ کی لائننگ میں مسافر محمد راشد علی نے اسلام آباد ایئرپورٹ پر بیگ کی تین تہوں میں جبکہ مسافر محمد نعمان نے پشاور ائیرپورٹ پر مذکورہ منشیات بیگ کی تہ میں کمال مہارت سے چھپا رکھی تھی،تاہم اے ایس ایف کے عملے نے تینوں واقعات میں سامان کی تلاشی کے دوران منشیات برآمد کر کے سمگلنگ کی کوششیں ناکام بنا دیں،ملزمان کو ابتدائی تفتیش کے بعدبرآمد شدہ منشیات سمیت مزید قانونی کارروائی کے لئے اے این ایف حکام کے حوالے کر دیا گیا-