پاکستانی عازمین حج کو آج رات منیٰ پہنچایا جائے گا

دنیابھرسے تقریباً تیس لاکھ عازمین مناسک حج کاآغازکرنے کے لئے آج رات سے منیٰ میں جمع ہوناشروع ہوجائیں گے۔

پاکستان کے حج مشن نے تمام عازمین کو آج رات منیٰ منتقل کرنے کے انتظامات مکمل کرلئے ہیں۔عازمین حج کل (پیر) دن اوررات خیمہ بستی میں گزارنے کے بعد کوہ عرفات روانہ ہوں گے۔

اکثرپاکستانی عازمین ٹرین کے ذریعے عرفات جانے کوترجیح دیںگے کیونکہ تاریخ میں پہلی مرتبہ تریسٹھ فیصد پاکستانیوں کو ٹرین کے راستے کے قریب خیمے دیئے گئے ہیں۔باقی عازمین کوہ عرفات کی طرف اپنامقدس سفربسوں پر کریں گے۔

پاکستانی حج مشن نے عازمین پرزوردیاہے کہ اپنی روانگی کے وقت کی پابندی کریں تاکہ رش اورگرم موسم کی صورتحال میں کسی مشکل سے بچ سکیں۔