ہاکی کا جونیئر ایشیا کپ،ڈچ کوچ کی خدمات حاصل کر لی گئیں

پاکستان ہاکی فیڈریشن نے جونئیر ایشیا کپ کی تیاری کیلئے دنیائے ہاکی کے معروف کوچ رویلمنٹ آلٹیمنز کی بطور کنسلٹینٹ خدمات حاصل لیں۔

جونیئرایشیاہاکی کپ 23 مئی تا یکم جون عمان کے شہر صلالہ میں کھیلا جائے گا،جس کی تیاریوں کے لیے ڈچ کوچ رویلمنٹ آلٹیمنز کو کنسلٹینٹ تعینات کر دیا گیا ہے۔

ہاکی ایونٹ کے پول اے میں روایتی حریف پاکستان اور بھارت کے علاوہ جاپان، تھائی لینڈ اور چائینیز تھائی پے جبکہ پول بی میں کوریا، ملائشیا، میزبان عمان، بنگلا دیش اور ازبکستان شامل ہیں۔

پاکستان اپنا پہلا میچ 23 مئی کو چائینیز تھائی پے، دوسرا میچ 24 مئی کو تھائی لینڈ اور تیسرا میچ 27 مئی کو روایتی حریف بھارت جبکہ 29 مئی کو جاپان کیساتھ کھیلے گا۔