راحیلہ خادم حسین نے خواتین کو جاہل کہنے پر ساحل عدیم کے خلاف مذمتی قرارداد جمع کرادی

مسلم لیگ ن نے سوشل میڈیا انفلوئنسر ساحل عدیم کی جانب سے خواتین کو جاہل قرار دیے جانے کے خلاف پنجاب اسمبلی میں قرارداد جمع کروا دی، پنجاب اسمبلی میں قرارداد مسلم لیگ ن کی رکن اسمبلی راحیلہ خادمُ حسین نے جمع کروائی۔

قراداد میں کہا گیا کہ حالیہ کچھ دنوں سے خواتین کے خلاف سوشل میڈیا اور الیکٹرانک میڈیا کو استعمال کرتے ہوئے ان کےبنیادی حقوق اور عزت نفس کو مسلسل مجروح کیا جارہا ہے۔خواتین کو بنیادی تعلیم سے محروم کرنے کے خلاف باقاعدہ مہم جاری ہے۔

متن قرارداد کے مطابق یہ ایوان اور اسکے معزز ممبران اسمبلی الیکٹرانک میڈیا پر 95 فیصد خواتین کو جاہل قرار
دینے پر شدید مذمت کا اظہار کرتے ہیں،حکومت پنجاب سے مطالبہ کرتے ہیں کہ آئین پاکستان اور اسلام کی روح کے مطابق ان شر پسند عناصر کو قانون کے کٹہرے میں لاکر قرار واقعی سزا دی جائے۔

قرارداد میں مطالبہ کیا گیا کہ ایسے پست ذہن لوگوں کی حوصلہ شکنی کی جائے اور ان کا سوشل میڈیا اورالیکٹرانک میڈیا کو استعمال کرنے پر ریاست کی طرف سے پابندی عائد کی جائے۔