شیخ رشید کی بلاول کے متعلق نازیبا گفتگو، اسلام آباد ہائیکورٹ کا فیصلہ سپریم کورٹ میں چیلنج

چیئرمین پیپلز پارٹی بلاول بھٹو زرداری کے خلاف نازیبا بیان پر شیخ رشید کے خلاف مقدمہ خارج کرنے کا فیصلہ سپریم کورٹ میں چیلنج کر دیا گیا۔ سندھ حکومت نے عوامی مسلم لیگ کے سربراہ شیخ رشید کے خلاف سپریم کورٹ میں درخواست دائر کی ہے۔

درخواست میں استدعا کی گئی کہ اسلام آباد ہائیکورٹ کا 25 جون کا فیصلہ خلاف قانون ہے جسے کالعدم قرار دیا جائے،چیمبر میں سماعت کر کے جج نے اپنا مائنڈ اپلائی نہیں کیا۔

درخواست میں کہا گیا کہ شیخ رشید نے میڈیا کے سامنے بلاول بھٹو کے خلاف نازیبا زبان استعمال کر کے پارٹی ورکرز کو اشتعال دلایا،بلاول بھٹو ایک بڑی سیاسی جماعت کے چیئرمین اور سابق وزیر خارجہ ہیں ان کے خلاف نازیبا زبان کا استعمال ملک میں صورتحال کی خرابی کا باعث بن سکتا ہے۔

درخواست میں موقف اختیار کیا گیا کہ ہائیکورٹ کا مقدمہ خارج کرنے کا فیصلہ خلاف قانون ہے اور مزید تحقیقات کا تقاضا کرتا ہے،ملزم نے اپنے جرم کا اعتراف کیا ہے،ایک جرم سرزد ہونے کی صورت میں اس کے دوسرے مقام پر اثرات کی بنیاد پر کاروائی ہو سکتی ہے۔

درخواست میں کہا گیا کہ اسلام آباد ہائیکورٹ نے اپنے اختیارات سے تجاوز کیا۔