آرٹس کونسل آف پاکستان کراچی کی جانب سے جاری “پاکستان تھیٹر فیسٹیول“ کے آٹھویں روز ” بوتھ سٹ ان سائلنس فار اوہیل“ پیش کیا گیا، جس میں معروف فنکاروں نے اپنی اداکاری کے جوہر دکھائے۔
کنول کھوسٹ کی ہدایت کاری میں بنائے گئے کھیل میں علی جونیجو اور راستی فاروق نے بہترین ادا کاری کا مظاہرہ کیا، شو میں میاں بیوی کے دو کرداروں کو دکھایا گیا ہے جو جلد اپنی راہیں جدا کرنے والے ہیں۔
اس انگلش شو میں جوائے لینڈ فلم میں کام کرنے والے اداکار علی جونیجونے شوہر جبکہ راستی فاروق نے بیوی کا کردار نبھایا۔ ”پاکستان تھیٹر فیسٹیول“ میں پاکستانی ڈراموں کی نامور اداکارہ ثانیہ سعید نے بھی شرکت کی۔
اس موقع پر انہوں نے کہاکہ بہت سالوں بعد ایسا ممکن ہوا ہے کہ ہمیں بین الاقوامی ڈرامے دیکھنے کو موقع مل رہے ہیں جوکہ خوش آئند بات ہے، جرمن اور امریکی تھیٹر گروپ کے علاوہ دیگر ممالک کی ورکشاپ کا سلسلہ جاری بھی رہنا چاہیے ، ایک آرٹسٹ کے لیے یہ بہت ضروری ہوتا ہے کہ ہم ان کے تجربے سے استفادہ کرتے رہیں ۔