زمان پارک میں حالات کشیدہ، پنجاب حکومت کا الٹی میٹم ختم ہونے کو، عمران نیب پیشی کے لیے گھر سے نہ نکلے

چیئرمین تحریک انصاف عمران خان نیب میں طلبی کے باوجود پیش نہ ہوئے۔ سابق  خاتون اول  کو بھی نیب نے آج طلب کر رکھا ہے لیکن ان کے پیش ہونے کے بھی امکانات نظر نہیں آتے۔

نیب نے القادر ٹرسٹ کیس میں عمران خان کودس  بجےاور بشریٰ  بی بی کو بارہ بجے پیش ہونے کی ہدایت کی تھی۔ سابق وزیراعظم اور ان کی اہلیہ سے   برطانیہ سے 19 کروڑ پاؤنڈ کی غیر قانونی منتقلی پر پوچھ گچھ ہونا تھی۔

اسلام آباد ہائیکورٹ نے عمران خان کو القادر ٹرسٹ کیس میں شامل تفتیش ہونے کا حکم دیا تھا۔ گزشتہ روز نیب ٹیم نے زمان پارک میں  طلبی کے نوٹس  دیے تھے۔ عمران خان عدالتی حکم کے باوجود آج شامل تفتیش نہیں ہوئے۔

زمان پارک میں حالات آج بھی کشیدہ ہیں، پنجاب حکومت نے زمان پارک میں چھپے مبینہ دہشتگردوں کی حوالگی کے لیے 24 گھنٹے کا الٹی میٹم دیا تھا جو دوپہر دو بجے پورا ہو رہا ہے۔

زمان پارک کی اطراف کی سڑکوں کورکاوٹیں لگا کربند کردیا گیا۔ پولیس کی بھاری نفری مال روڈ، دھرم پورہ، علامہ اقبال روڈ پر موجود ہے۔ چند کارکن عمران خان کی رہائش گاہ کے اندر اورباہر موجود ہیں اور پارٹی لیڈر کو سیکیورٹی فراہم کر رہے ہیں۔

پنجاب حکومت کے وزیر اطلاعات عامر میر نے گزشتہ رات نجی ٹی وی سے گفتگو کرتے ہوئے کہا تھا کہ 24 گھنٹے کے الٹی میٹم کے بعد قانون حرکت میں آئے گا۔ اس سے پہلے زمان پارک میں کسی کارروائی کا کوئی فیصلہ نہیں کیا گیا۔