سکھر، لاڑکانہ تعلیمی بورڈز: میٹرک امتحانات کے پرچے آؤٹ،حیدرآبادمیں بھی واٹس ایپ پر سرعام نقل

سندھ میں تعلیمی نظام پر کئی بار سوال اٹھتے ہیں اور اس کی وجہ امتحانات میں سرعام نقل اور پرچہ آؤٹ ہونے کے واقعات ہیں۔ اس بار بھی دو ثانوی تعلیمی بورڈز سکھراورلاڑکانہ کے میٹرک امتحانات کے پرچے آؤٹ ہوگئے۔ حیدرآباد بورڈ کے زیرانتظام میٹرک امتحانات میں طلبہ موبائل فونز کی مدد سے پرچے حل کرتے رہے، نقل مافیا واٹس ایپ پر سوالات کے جواب لکھواتا رہا۔

سکھر ثانوی تعلیمی بورڈ کے میٹرک کے امتحانات کا آج پہلا روز ہے، پہلا پرچہ انگلش کا تھا اور امتحان شروع ہونے سے پہلے سوال نامہ واٹس ایپ گروپوں میں گردش کر رہا تھا۔

سوال نامہ واٹس ایپ گروپوں میں گردش کرنے کی اطلاعات کوٹ ڈیجی، میرپورخاص اورپنوں عاقل سے ملیں ۔ اردو کرانیکل کے نمائندوں نے ان اطلاعات کی تصدیق کی۔

اردو کرانیکل کے نمائندوں کی رپورٹس کے مطابق پرچہ وقت سے پہلے آؤٹ ہونے پر طلبہ نے جوابات کے نوٹس موبائل فونز میں تیار کر رکھے تھے اور وہ پرچہ ان نوٹس کی مدد سے حل کرتے رہے۔ پنوں عاقل میں گورنمنٹ سکول بھیلار کے طلبہ کو بھی امتحانی وقت شروع ہونے سے پہلے سوال نامے کی کاپی مل چکی تھی۔

لاڑکانہ تعلیمی بورڈ کا سندھی کا پرچہ بھی واٹس ایپ کے ذریعے آؤٹ ہوگیا، نقل مافیا واٹس ایپ کے ذریعے کمرہ امتحان میں موجود طلبہ کو پرچہ حل کراتا رہا۔

حیدرآباد ثانوی تعلیمی بورڈ میں طلبہ کمرہ امتحانات میں موبائل فونز کی مدد سے سرعام نقل کرتے رہے، نقل مافیا واٹس ایپ کی مدد سے طلبہ کو سوالنامہ حل کراتا رہا۔

سندھ میں امتحانات کے دوران ہر سطح پرنقل کا سلسلہ ایک عرصہ سے چل رہا ہے اور ہر بار تعلیمی بورڈز نقل روکنے کے دعوے کرتے ہیں لیکن نقل مافیاز ہر بار تعلمی بورڈز اور مقامی انتظامیہ پر بھاری پڑجاتے ہیں۔