پاک امریکا 76 سالہ دوستی مشکل وقت میں بھی برقرار رہی، احسن اقبال

وفاقی وزیر منصوبہ بندی ، ترقی ، اصلاحات و خصوصی اقدامات احسن اقبال نے کہا ہے کہ پاکستان امریکا کی 76 سالہ دوستی مشکل وقت میں بھی برقرار رہی، سرد جنگ اور دہشت گردی کے خلاف جنگ کے دوران دونوں ممالک کے باہمی اتحاد نے تاریخی مثال قائم کی، مختلف پیشوں سے وابستہ 10 لاکھ پاکستانی امریکا میں آباد ہیں۔ ان خیالات کا اظہارانہوں نے امریکی یوم آزادی کے سلسلہ میں امریکی سفارتخانے میں منعقدہ تقریب سے خطاب کرتےہوئے کیا۔

احسن اقبال نے کہا کہ منگلا اور تربیلا ڈیم جیسے میگا پراجیکٹس کی تعمیر امریکا کی مدد سے ممکن ہوئی ۔ انہوں نے کہا کہ مختلف پیشوں سے وابستہ 10 لاکھ پاکستانی امریکا میں آباد ہیں۔ دنیا بھر سے فل برائٹ اسکالرشپ کے تحت تعلیم حاصل کرنے والوں میں سب سےزیادہ تعداد پاکستانیوں کی ہے۔ مجھے پنسلوانیا کے مشہور وارٹن سکول میں 1984 سے 1986 تک پڑھنے کا موقع ملا۔ انہوں نے کہا کہ میں نے دیکھا کس طرح امریکی یونیورسٹیاں ملک کی معاشی ترقی میں کلیدی کردار ادا کرتی ہیں۔ 2013 میں امریکا پاکستان نالج کوریڈور شروع کیا۔ آئندہ دس سالوں میں اعلیٰ امریکی یونیورسٹیوں میں 10 ہزار پاکستانی طلبا پی ایچ ڈی کی تعلیم حاصل کریں گے۔