سیاسی معاملات مذاکرات سے ہی حل ہو سکتے ہیں، توقع ہے تمام جماعتیں ایک ساتھ الیکشن پر متفق ہوجائیں گی، سپریم کورٹ

سپریم کورٹ نے ملک بھر میں ایک ہی دن انتخابات کرانے کی توقع کا اظہار کرتے ہوئے کیس کی سماعت غیرمعینہ مدت کے لیے ملتوی کردی۔

سپریم کورٹ نے ملک میں ایک ہی دن الیکشن کرانے کے کیس کی 5 مئی کی سماعت کا تحریری حکمنامہ جاری کیا ہے، اس آرڈر میں کہا گیا ہے کہ سیاسی جماعتوں کے مسائل مذاکرات سے حل کرنے کی کوشش قابل ستائش ہے،سیاسی معاملات مذاکرات اور اتفاق رائے سے ہی بہتر انداز میں حل ہوسکتے ہیں،توقع ہے سیاسی جماعتیں ملک بھر میں ایک ساتھ انتخابات پر متفق ہوجائیں گی۔

عدالتی حکم میں کہا گیا کہ پی ٹی آئی اور حکومتی کمیٹیوں نے مذاکراتی عمل پر اپنی اپنی رپورٹس جمع کرائیں،سعد رفیق نے بتایا کہ ایک ساتھ انتخابات کرانے پر اتفاق رائے ہوگیا ہے،سعد رفیق نے کہا مذاکرات جاری رہے تو تاریخ پر بھی اتفاق ہوجائے گا،شاہ محمود قریشی نے جواب میں مذاکرات میں پیش رفت پر مایوسی کا اظہار کیا۔

عدالتی حکم میں بتایا گیا کہ کیس کی سماعت غیر معینہ مدت کیلئے ملتوی کی جاتی ہے۔