چیف الیکشن کمشنر استعفیٰ دیں ورنہ جوڈیشل کونسل میں ریفرنس دائر کیا جائےگا، احمد خان بھچر

اپوزیشن لیڈر پنجاب اسمبلی ملک احمد خان بھچر نے چیف الیکشن کمشنر سے فوری مستعفی ہونے کا مطالبہ کردیا ۔۔ملک احمد خان بھچر نے کہا ہے کہ اگر چیف الیکشن کمشنر مستعفی نہ ہوئے تو سپریم جوڈیشل کونسل میں ریفرنس دائر کریں گے۔پی ٹی آئی پر پابندی لگانے کے حکومتی فیصلے میں پیپلزپارٹی ساتھ نہیں ہے۔ ٹک ٹاکر وزیر اعلیٰ پنجاب کو پی ٹی آئی کے بجائے عوام پر توجہ دینی چاہیے۔

لاہور ہائیکورٹ میں میڈیا سے گفتگو کرتے ہوئے احمد خان بھچر نے کہا کہ ملک میں آرٹیکل 6 اس سے پہلے بھی لگ چکے ہیں،سیاسی بنیادوں پر تمام کاروائیاں کی جارہی ہیں،پاکستان تحریک انصاف ملک کی سب سے پاپولر جماعت ہے۔

احمد خان بھچر نے کہا کہ یہ ظلم کی رات ختم ہونے والی ہے جلد یہ رات ختم ہونے والی ہے،بانی پی ٹی آئی کو زیادہ دیر اندر نہیں رکھا جاسکتا،وزیر اعلیٰ پنجاب صرف ہمارے خلاف کاروائیاں کروا رہی ہے،ہم اس مہنگائی کے خلاف جلد سٹرکوں پر آرہے ہیں،ہماری حکمت عملی تیار ہے۔