کسٹمز کے معاملات چلانے کے لیے خصوصی کسٹمز بورڈ تشکیل دینے جانے کا امکان

نگراں حکومت کی جانب سے جاری اصلاحاتی منصوبے کے تحت پاکستان کسٹمز کے معاملات چلانے کے لیے خصوصی کسٹمز بورڈ تشکیل دیئے جانے کا امکان ہے۔

ٹیکس اصلاحات کے پروگرام کے تحت پانچ وفاقی سیکرٹریز بشمول خزانہ، صنعت و پیداوار، نیشنل فوڈ سیکیورٹی، کامرس اور داخلہ کسٹمز بورڈ کے ممبران ہوں گے۔

ذرائع نے بتایا کہ ایف بی آر کے چیئرمین امجد زبیر ٹوانہ نے حال ہی میں نگراں وزیراعظم انوار الحق کاکڑ کو ایف بی آر کے اصلاحاتی ایجنڈے پر بریفنگ دی۔

حکومت نے مبینہ طور پر کسٹمز ڈپارٹمنٹ میں “ممبر اپریزمنٹ” کی ایک نئی پوسٹ بنانے کا فیصلہ کیا ہے تاکہ اپریزمنٹ کو آپریشنز اور انفورسمنٹ سے الگ کیا جا سکے۔

ذرائع کے مطابق حکومت کا نئے اصلاحاتی فریم ورک کے تحت ٹریک اینڈ ٹریس سسٹم میں مزید شعبوں کو شامل کرنے کا بھی منصوبہ ہے۔

مزید برآں، ٹیکس حکام تمام سپلائی چین کی نگرانی اور اسمگلنگ کے خطرے کو کم یا ختم کرنے کے لیے مخصوص شعبوں میں ایک الیکٹرانک انوائسنگ سسٹم بھی متعارف کرائیں گے۔