جب تک قانونی رسک زیرو نہیں ہوجاتا نواز شریف کی وطن واپسی کا سوچا بھی نہیں جائے گا، خواجہ آصف

 مسلم لیگ ن کے سنیئر رکن اور سابق وزیر دفاع خواجہ آصف نے کہا ہے کہ نواز شریف وطن واپس ضرور آئیں گے اور ہم نہیں چاہتے کہ کوئی ان کے خلاف سکور سیٹل کر رہا ہو یا عدلیہ ان کے متعلق کوئی ایسا فیصلہ دے اس لیے ان کے خلاف تمام رسک زیرو کر کے انھیں وطن واپس لایا جائے گا۔

جیو نیوز کے پروگرام میں گفتگو کرتے ہوئے خواجہ آصف سے سوال ہوا کہ اس وقت ایک سیاسی جماعت پی ٹی آئی کے سربراہ عمران خان جیل میں ہیں اور اگر نواز شریف وطن واپس آتے ہیں اور انھیں ضمانت نہیں ملتی تو شاید انھیں بھی کچھ وقت کے لیے جیل جانا پڑے۔

اس کے جواب میں خواجہ آصف نے کہا کہکہ ’جب تک قانونی و آئینی اعتبار سے نواز شریف کے لیے رسک زیرو نہیں ہو جاتا تب تک ان کی وطن واپسی کا نہیں سوچیں گے۔‘

انھوں نے سپریم کورٹ کی جانب سے ریویو آف ججمنٹ ایکٹ کے فیصلے پر بات کرتے ہوئے کہا کہ جیسا کہ قومی اسمبلی تحلیل کرنے کے بعد یہ فیصلہ سنایا گیا لیکن میرا خیال ہے کہ اس فیصلے کا نواز شریف کی نااہلی پر کوئی منفی اثر نہیں پڑتا۔ ان کی نا اہلی پانچ سال گزرنے کے بعد ختم ہو چکی ہے۔‘

خواجہ آصف نے کہا کہ انوار الحق کاکڑ کی بطور نگراں وزیر اعظم تعیناتی سے الیکشن کے انعقاد میں التوا کی خبروں میں کوئی صداقت نہیں ہے۔ یہ جو کہا جا رہا ہے کہ ان کی تعیناتی سے نگراں سیٹ اپ کو دوام بخشا جائے گا یا الیکشن میں تاخیر کی جا سکتی ہے ایسا کچھ نہیں۔ میں سمجھتا ہوں کہ اس سے الیکشن کے انعقاد کی تاریخ پر کوئی فرق نہیں پڑے گا اور الیکشن اگلے برس جنوری فروری میں ہی ہوں گے

خواجہ آصف نے مزید کہا کہ ’نئی حلقہ بندیوں کے حوالے سے ایک دو ماہ آگے پیچھے ہو سکتے ہیں، اس کی آئین بھی اجازت دیتا ہے لیکن میرے خیال میں یہ اگلے برس کے آغاز پر ہو جائیں گے۔‘