بحیرہ عرب میں ہوا کا کم دباؤ،منگل کو ڈپریشن میں بدل سکتا ہے، محکمہ موسمیات

جنوب مشرقی بحیرہ عرب میں ہوا کا کم دباو بن گیا،منگل کی شام کوڈپریشن میں تبدیل ہوسکتا ہے،پاکستان کے کسی ساحلی مقام کوایل پی اے(لو پریشر ایریا)سے کوئی خطرہ نہیں ہے۔

محکمہ موسمیات کراچی کی جانب سے جاری اعلامیے کے مطابق جنوب مشرقی بحیرہ عرب میں ہوا کا کم دباؤ بن گیا،لوپریشرایریا کل شام کوایک درجہ مزید شدت اختیارکرنے کے بعد ڈپریشن میں تبدیل ہوسکتا ہے۔

ہوا کا کم دباؤ کراچی کے جنوب اورجنوب مغرب میں 1550کلومیٹر کی دوری پرہے، ڈپریشن میں تبدیل ہونے کے بعد شمال مغرب کی جانب بڑھے گا،پاکستان کے کسی ساحلی علاقے کوہوا کے کم دباو سے کوئی خطرہ نہیں ہے۔

محکمہ موسمیات کا سائیکلون وارننگ سینٹر کراچی تمام صورتحال کا باریک بینی سے مشاہدہ کررہا ہے،بحیرہ عرب میں ہونے والی اس سرگرمی کی پیش رفت سے متعلق وقتا فوقتا آگاہی دی جائیگی۔