یکم نومبر تک واپس نہ جانے والے افغان مہاجرین کے لیے ملک بھر میں 49 ہولڈنگ پوائنٹس قائم

یکم نومبر سے غیر ملکی غیر قانونی افراد کی وطن واپسی  کیلئے جامِع انتظامات کر لیے گئے۔ملک بھر میں غیر قانونی غیر ملکی افراد کی وطن واپسی  کیلئے49ہولڈنگ ایریاپوائنٹس  قائم کئے گئے ہیں۔پوائنٹس کا مقصد غیرقانونی غیرملکیوں کو باعزت طریقے سے بارڈر پار کروانا ہے۔ پنجاب،خیبرپختونخوا،سندھ،بلوچستان میں  ہولڈنگ ایریا پوائنٹس  بنائےگئےہیں۔

پنجاب میں تمام 36 اضلاع میں ہولڈنگ سینٹرز بنا دیے گئے ہیں،خیبر پختونخوا میں  تین  ہولڈنگ پوائنٹس پشاور، ہری پور اور لنڈی کوتل میں بنائے گئے ہیں،سندھ میں دو ہولڈنگ پوائنٹس کیماری اور ملیر میں بنائے گئے ہیں،بلوچستان میں تین ہولڈنگ پوائنٹس کوئٹہ، پشین اور چاغی میں بنائے  گئے ہیں۔

گلگت بلتستان اور اسلام  آباد میں ایک ایک ہولڈنگ پوائنٹ  بنایا گیا ہے جو کہ بالترتیب گلگت اور حاجی کیمپ اسلام آباد میں ہے۔

وطن واپسی کے لیے آٹھ کراسنگ پوائنٹس استعمال کئے جائیں گے۔ چار کراسنگ پوائنٹس بلوچستان سے اور چار خیبر پختونخوا سے افغانستان بارڈر سے ملحقہ علاقوں کا استعمال کیا جائے گا۔

خیبر پختونخوا کی طرف سے طورخم، خرلاچی، غلام خان اور انگور اڈا کراسنگ پوائنٹس کا استعمال کیا جائے گا،بلوچستان میں چمن، برابچہ، نور وہاب اور بادینی کراسنگ پوائنس کو مختص کیا گیا ہے ۔

اِس کے علاؤہ  جانے والے افراد کی سہولت  اور کراسنگ پوائنٹس   پر آسانی کے لئیے نادرا کی طرف سے اسپیشل ایپلیکیشن بھی متعارف کروا دی گئی ہے، غیر قانونی غیر ملکیوں کے وطن واپسی کے عمل کی نگرانی اور سہولت کے لئیے وزارتِ داخلہ میں بھی کنٹرول روم بنا دیا گیا ہے

پاک افغان بارڈر پر آمدورفت کی سہولت کے لئے قلعہ عبداللہ اور خیبر (جمرود) میں  دو نئے پاسپورٹ آفیسز   بھی بنا دیے گئے ہیں۔کسی بھی صورت حال سے نمٹنے کے لئے خیبر  پختونخوا حکومت نے 1700 ایمرجنسی نمبر بھی جاری کر دیا ہے،یکم نومبر سے ڈیپورٹیشن کے ساتھ ساتھ آئندہ کے لیئے پاک افغان بارڈر پر ون ڈاکومنٹ (پاسپورٹ) رجیم بھی نافذالعمل کر دی گئی ہے۔