پشاور میں 5، صوبے بھر سے 26 گرفتاریاں، درجنوں کارکن پکڑے گئے، تحریک انصاف

خیبر پختونخوا کے صوبائی دارالحکومت پشاور میں پولیس حکام کے مطابق اب تک پشاور سے پانچ افراد کو حراست میں لیا گیا ہے۔ جبکہ تحریک انصاف کے رہنماؤں نے درجنوں گرفتاریوں کا دعویٰ کیا ہے۔

پولیس حکام نے بتایا ہے احتجاج کے لیے کوئی زیادہ لوگ باہر نہیں نکلے تاہم ہشتنگری کے علاقے سے پانچ افراد کو حراست میں لیا گیا ہے۔ جی ٹی روڈ پر پیر عبدالطیف فلائی اوور پر بھی پی ٹی آئی کے کارکنوں نے احتجاجی مظاہرہ کیا ہے لیکن وہ فوری طور پر منتشر ہو گئے تھے۔

ادھر تحریک انصاف کے رہنماؤں کا دعویٰ ہے کہ صوبے بھر میں کارکنان نے عمران خان کی گرفتاری پر احتجاجی مظاہروں میں حصہ لیا تاہم ان میں سے درجنوں افراد کو پولیس کی جانب سے حراست میں لیا گیا ہے۔

پی ٹی آئی کے رہنما ندیم شاہ ایڈووکیٹ نے کہا کہ پشاور، چارسدہ، باجوڑ، تخت بائی اور بنوں سمیت مختلف شہروں میں احتجاجی مظاہرے ہوئے۔ ان کا دعویٰ ہے کہ مردان سے 26 کارکنان کو زیر حراست لیا گیا۔