سیستان و بلوچستان میں متعدد دھماکوں میں 7 غیر ایرانی شہری ہلاک ہوئے، ایرانی ٹی وی کی پاکستان کے آپریشن پر رپورٹ

ایران کے سرکاری میڈیا پریس ٹی وی نے ایران کے اندر پاکستان کے ٹارگٹڈ آپریشن کے دوران 7 غیرمقامی افراد کی ہلاکت کی اطلاع دی ہے۔

پریس ٹی وی کی رپورٹ کے مطابق ملک کے جنوب مشرقی صوبے سیستان و بلوچستان میں متعدد دھماکوں میں سات غیر ایرانی شہری ہلاک ہو گئے ہیں۔

پریس ٹی وی کے مطابق ایک ایرانی سیکیورٹی اہلکار نے بتایا کہ جمعرات کی صبح سویرے پاکستان کی سرحد کے قریب صوبہ سیستان اور بلوچستان کے جنوب مشرقی شہر سراوان کے آس پاس کے مختلف علاقوں میں متعدد دھماکوں کی آوازیں سنی گئیں۔

رپورٹ کے مطابق صوبے کے نائب گورنر علی رضا مرہماتی نے IRNA کو بتایا کہ ایرانی سیکورٹی حکام اس معاملے کی تحقیقات کر رہے ہیں۔

انہوں نے مزید کہا کہ ہلاک ہونے والوں میں تین خواتین اور چار بچے شامل ہیں۔

پریس ٹی وی کے مطابق ایک باخبر ذریعے نے بتایا کہ ایران نے پاکستان سے اس واقعے کے بارے میں “فوری وضاحت” کا مطالبہ کیا ہے۔