ترک صدر اگلے ہفتے فلسطینی ہم منصب اور اسرائیلی وزیراعظم کے میزبان ہوں گے

ترکی کے صدر رجب طیب اردوان اگلے ہفتے اسرائیل کے وزیراعظم بنجمن نیتن یاہو اور فلسطین کے صدر محمود عباس کے میزبان ہوں گے، دونوں مہمان تین دن کے فرق سے انقرہ کا دورہ کریں گے۔

فلسطین کے صدر محمود عباس 25 جولائی اور اسرائیلی وزیراعظم 28 جولائی کو انقرہ کا دورہ کریں گے۔

ترکی کے ایک سرکاری بیان میں کہا گیا کہ صدر رجب طیب اردوان کی دعوت پر دورہ کرنے والے رہنما حالیہ علاقائی اور بین الاقوامی امور پر تبادلہ خیال کریں گے۔

بیان میں کہا گیا کہ صدر اردوان اور صدر عباس کے درمیان ملاقات میں ترکی فلسطین تعلقات، اسرائیل فلسطین تنازع میں حالیہ واقعات اور دیگر علاقائی و بین الاقوامی امور زیر بحث آئیں گے۔

بیان میں کہا گیا کہ ترکی اور برادر فلسطین کے درمیان تعاون کے فروغ کے اقدامات بھی ایجنڈے کا حصہ ہیں۔

بیان میں کہا گیا کہ اردوان اور نیتن یاہو کے درمیان ہونے والی ملاقات میں ترکی اور اسرائیل کے دوطرفہ تعلقات کا ’’تمام جہتوں میں جائزہ‘‘ لیا جائے گا، ساتھ ہی تعاون کو بہتر بنانے کے لیے ضروری اقدامات کا بھی جائزہ لیا جائے گا،ملاقات کے دوران، موجودہ علاقائی اور بین الاقوامی مسائل کے ساتھ ساتھ دو طرفہ تعلقات پر بھی تبادلہ خیال کیا جائے گا۔

ترکی کے سابق وزیر خارجہ چاؤش اوغلو نے مئی 2022 میں مقبوضہ مغربی کنارے اور اسرائیل کے دورے کے دوران فلسطینیوں کی آزادی اور خودمختاری کے لیے اپنے ملک کی حمایت کا اعادہ کیا تھا، مغربی کنارے کے شہر رام اللہ میں اپنے فلسطینی ہم منصب ریاض المالکی سے ملاقات کے بعد بات کرتے ہوئے، چاوش اوغلو نے کہا کہ ترکی کی "فلسطینی کاز کی حمایت اسرائیل کے ساتھ ہمارے تعلقات کے دوران مکمل طور پر آزاد ہے”۔

اگست 2022 میں، اسرائیل اور ترکی نے سفیروں کی تعیناتی کے ذریعے مکمل سفارتی تعلقات بحال کئے تھے۔   2018 میں، ترکی نے اسرائیل کے ساتھ تعلقات ککم کر دئیے تھے جب اسرائیلی افواج نے 60 فلسطینیوں کو ہلاک کر دیا تھا۔

تعلقات کی بحالی کا فیصلہ اس وقت کے اسرائیلی وزیر اعظم یائر لاپید کے دورہ انقرہ اور چاوش اوغلو کے ساتھ ان کی ملاقاتوں اور اردوان کے ساتھ بات چیت کے بعد کیا گیا تھا۔

نومبر 2022 میں، دو طرفہ بات چیت کے دوران، ترکی نے اسرائیل کے مطالبات کو ماننے سے انکار کر دیا جس میں ملک میں مقیم حماس کے رہنماؤں کی ملک بدری کی درخواست کی گئی تھی۔

چاوش اوغلو نے کہا کہ انقرہ غزہ کی پٹی پر حکمرانی کرنے والی فلسطینی مزاحمتی تحریک حماس کو ایک دہشت گرد گروپ کے طور پر نہیں دیکھتا اور انہیں بے دخل کرنے سے انکار کرتا ہے۔