تھیٹرز کی بندش کے خلاف درخواست پر پنجاب حکومت سے جواب طلب

لاہور ہائیکورٹ نے  تھیٹروں کی بندش کیخلاف درخواست پر  پنجاب حکومت سمیت دیگر فریقین سے جواب طلب کرلیا ہے۔

لاہور ہائیکورٹ کے جسٹس مزرا وقاص رؤف نے پنجاب آرٹسٹ اور پروڈیوسرز اینڈ ٹھیٹر ایسوسی ایشن کی درخواست پر سماعت کی، جس میں تھیٹرز کیخلاف کارروائی اور بندش کو چیلنج کیا گیا۔

عدالت نے آئندہ سماعت پر متعلعہ ذمہ دار افسروں کو جواب سمیت ذاتی حیثیت میں طلب کرلیا۔ درخواست گزار تنظیم کے وکیل کرم الٰہی نے نشاندہی کی کہ بغیر کسی قانونی جوازکے تھیٹرز بند کئے جا رہے ہیں  اور فخاشی کو جواز بنا کر یہ کارروائی عمل میں لائی جا رہی ہے۔

وکیل نے واضح کیا کہ تھیٹرز میں کسی قسم کی فحاشی نہیں ہورہی بلکہ شہریوں کو صاف ستھری تفریح فراہم کی جارہی ہے اور آئین کےتحت قانونی کاروبار کرنا ہرشہری کا بنیادی حق ہے۔

درخواست گزار کے وکیل نے استدعا کی کہ تھیٹرز کی بندش سے مالکان، فنکاروں اور عملے کومعاشی مشکلات کا سامنا ہے۔ اس لیے تھیٹرز کیخلاف حکومتی کارروائی روکتے ہوئے تھیٹرز فوری کھولنے کا حکم دیا جائے ۔