ایف بی آر نے 11 ہزار بڑے ٹیکس نادہندگان کی فہرست بنالی، گرفتاری سے پہلے ادائیگی کا موقع دیا جائے گا

فیڈرل بورڈ آف ریونیو (ایف بی آر) نے ملک کے تمام بڑے شہروں میں ٹیکس نادہندگان کے خلاف بڑے پیمانے پر ریکوری مہم شروع کردی ہے۔

ذرائع نے بتایا کہ ایف بی آر نے ایف بی آر کی انفورسمنٹ ایکسرسائز کے تحت ٹیکس نادہندگان کے خلاف بقایا جات کی وصولی کے لیے اعلیٰ سطح پر فیصلہ کیا ہے۔

اس سلسلے میں، ایف بی آر نے تقریباً 11,000 ٹیکس نادہندگان کی فہرست مرتب کی ہے اور قانون کی متعلقہ دفعات کے تحت ریکوری کی کارروائی شروع کرنے کے لیے ان کے نام متعلقہ ٹیکس دائرہ کار اور فیلڈ دفاتر کو بھیج دیے ہیں۔

ٹیکس نادہندگان جن کا تعلق کراچی، لاہور، فیصل آباد، راولپنڈی اور ملتان کے علاقوں سے ہے، ان میں صنعتی یونٹس، فیکٹریاں/ملز مالکان، ہول سیلرز، پراپرٹی ڈیلر اور تاجر شامل ہیں۔ ایف بی آر ٹیکس نادہندگان کی گرفتاری جیسی انتہائی کارروائی کرنے سے پہلے تمام قانونی کارروائیاں مکمل کرے گا اور ان کو بھیجے گئے نوٹسز کا جواب دینے کا موقع فراہم کیا جائے گا۔

ایف بی آر پہلے ہی انتہائی امیر لوگوں کے خلاف ریکوری کی کارروائی شروع کر چکا ہے، جو اپنے بیرون ملک موجود غیر ملکی اثاثوں پر 3 ارب روپے کیپٹل ویلیو ٹیکس (سی وی ٹی) ادا کرنے سے گریزاں تھے۔ بورڈ نے غیر ملکی اثاثوں پر CVT ادا کرنے میں ناکام رہنے والے ان انتہائی امیر افراد کے خلاف زبردستی اقدامات کیے ہیں۔ ایف بی آر نے بار بار نوٹسز کا جواب نہ دینے پر 200 امیر افراد کے خلاف احکامات جاری کر دیئے۔