بھارت میں تعینات افغان سفیر اور سینئر سفارتکاروں نے امریکا، یورپ میں سیاسی پناہ لے لی، سفارتخانہ بند

ہندوستان میں افغان سفارت خانے میں تعینات سفیر اور دیگر سینئر سفارت کاروں نے یورپ اور امریکہ میں سیاسی پناہ لے لی اور بھارت چھوڑ دیا ہے جس کے بعد نئی دہلی میں افغان سفارتخانے نے کام کرنا بند کردیا ہے۔ یہ بات افغان سفارتخانے کے تین ذرائع نے روئٹرز کو بتائی۔

بھارت طالبان کی حکومت کو تسلیم نہیں کرتا، اور 2021 میں طالبان کے کنٹرول میں آنے کے بعد کابل میں اپنا سفارت خانہ بند کر دیا تھا، لیکن نئی دہلی نے معزول افغان صدر اشرف غنی کی مغربی حمایت یافتہ حکومت کی طرف سے تعینات سفیر اور مشن کے عملے کو ویزا جاری کرنے اور تجارتی معاملات سنبھالنے کی اجازت دے دی تھی۔

سفارت خانے کے حکام نے بتایا کہ کم از کم پانچ افغان سفارت کار ہندوستان چھوڑ چکے ہیں۔ افغان عہدیداروں میں سے ایک نے کہا کہ ہندوستانی حکومت اب سفارتی کمپاؤنڈ کو نگران حیثیت میں اپنے قبضے میں لے گی۔

اس معاملے کے بارے میں پوچھے جانے پر، نئی دہلی میں ہندوستانی وزارت خارجہ کے ایک اہلکار نے کوئی تفصیلات بتائے بغیر کہا کہ وہ پیش رفت کا جائزہ لے رہے ہیں۔

کابل میں طالبان عہدیدار فوری طور پر تبصرہ کے لیے دستیاب نہیں تھے۔

ہندوستان ان درجن بھر ممالک میں سے ایک ہے جس کا کابل میں ایک چھوٹا سا مشن تجارت، انسانی امداد اور طبی امداد میں سہولت فراہم کرنے کے لیے ہے۔ 2019-2020 میں دو طرفہ تجارت 1.5 بلین ڈالر تک پہنچ گئی، لیکن طالبان حکومت کے اقتدار سنبھالنے کے بعد اس میں زبردست کمی آئی۔

اس ماہ کے شروع میں طلباء کے ویزوں کی میعاد ختم ہونے کے باوجود بھارت میں مقیم سیکڑوں افغان کالجوں کے طلباء نے نئی دہلی میں ایک مظاہرہ کرتے ہوئے بھارتی حکومت سے اپنے قیام میں توسیع کا مطالبہ کیا۔