پی آئی اے نجکاری فہرست میں پہلے نمبر پر، ورلڈ بینک کو بتا دیا گیا

نجکاری کمیشن نے جمعرات کو نگران حکومت کے نجکاری کے اسٹریٹجک ایجنڈے پر تبادلہ خیال کیا، جس میں پی ۤئی اے اور دیگر ریاستی ملکیتی اداروں کی نجکاری اور بجلی کی تقسیم کار کمپنیوں کی کارکردگی کو بہتر بنانے پر بات کی گئی۔

جمعرات کو اسلام آباد میں وفاقی وزیر برائے نجکاری فواد حسن فواد اور عالمی بینک کے کنٹری ہیڈ ناجی بن حسین کے درمیان ملاقات ہوئی۔

اس مشترکہ کوشش کا مقصد ان اداروں کے ذریعے ہونے والے مالی نقصانات کو دور کرنا ہے اور اس طرح حکومت پر پڑنے والے مالی بوجھ کو کم کرنا ہے۔

وفاقی وزیر نے کہا کہ حکومت اور تمام ادارہ جاتی اسٹیک ہولڈرز نے متفقہ طور پر بڑے خسارے میں چلنے والے سرکاری اداروں کی نجکاری شروع کرنے پر اتفاق کیا ہے جو پہلے ہی نجکاری کی فہرست میں شامل ہیں۔ یہ سرکاری ادارے نقصان کے ذمہ دار ہیں۔

پی آئی اے اپنے مسلسل اور حیران کن مالی خسارے کی وجہ سے نجکاری کے لیے اولین ترجیح بن کر ابھری ہے جس کی خسارے کی رقم سالانہ اربوں روپے ہے۔

پی آئی اے کی نجکاری ان نقصانات کو دور کرنے اور اس کی آپریشنل کارکردگی کو بہتر بنانے کے لیے ضروری سمجھا جاتا ہے۔

وزیر فواد حسن فواد نے پی آئی اے کی نجکاری کے منصوبے کے خاکے کی وضاحت کرتے ہوئے اس کوشش کے ابتدائی مراحل میں عالمی بینک اور دیگر مالیاتی اداروں کو شامل کرنے کے حکومتی ارادے کا اظہار کیا۔

سب سے بڑا مقصد نجکاری کے عمل کے ذریعے انتہائی ضروری نجی سرمایہ کاری کو راغب کرنا ہے۔

مزید برآں، وزیر نے پی آئی اے کے لیے ایک جامع ماڈل تیار کرنے کے ارادے پر روشنی ڈالی، جس میں مستقبل میں ممکنہ تعاون کے لیے عالمی بینک کلیدی شراکت دار رہے گا۔

وفاقی وزیر نے بجلی کی تقسیم کار کمپنیوں کے سالانہ نقصانات کے حوالے سے بھی تبادلہ خیال کیا، جو کہ اس وقت 2.5 بلین ڈالرز پر ہیں۔

ان نقصانات کو کم کرنے کے لیے ایک طویل مدتی رعایتی ماڈل بنانے پر توجہ مرکوز کرتے ہوئے بین الاقوامی مالیاتی کارپوریشن کے ساتھ دو نتیجہ خیز سیشنز پہلے ہی منعقد ہو چکے ہیں۔

بین الاقوامی مالیاتی کارپوریشن کے ساتھ جاری بات چیت سے توقع کی جاتی ہے کہبجلی کی تقسیم  میں نجی شعبے کی شرکت کے لیے ایک ٹھوس حکمت عملی سامنے آئے گی، جس کا بنیادی مقصد نقصان میں کمی اور کارکردگی میں اضافہ کے حصول کے لیے نجکاری کرنا ہے۔

وفاقی وزیر برائے نجکاری فواد حسن فواد اور عالمی بینک کے کنٹری ہیڈ ناجی بین حسین کے درمیان ملاقات پی آئی اے اور ڈسکوز کو درپیش اہم مالیاتی چیلنجز سے نمٹنے کے لیے باہمی تعاون کے مثبت عزم کے ساتھ اختتام پذیر ہوئی۔