شیخ رشید ایک رات زیر علاج رہنے کے بعد ہسپتال سے ڈسچارج

عوامی مسلم لیگ کے سربراہ شیخ رشید احمد کو راولپنڈی انسٹیٹیوٹ آف کارڈیالوجی سے ڈسچارج کر دیا گیا۔

شیخ رشید کے قریبی ذرائع کے مطابق سابق وزیر داخلہ کو منگل کی دوپہر ڈاکٹروں نے دوسری مرتبہ طبی معائنہ کے بعد اسپتال سے ڈسچارج کرکے گھر جانے کی اجازت دی۔

شیخ رشید احمد کو مشین پر لی گئی دل کی ریڈنگز،مختلف ٹیسٹ رپورٹس کے حتمی نتائج پر سینئر ڈاکٹرز کے مشورہ کے بعد آگاہ کرنے کا کہا گیا۔

اسپتال سے ڈسچارج ہونے کے بعد عوامی مسلم لیگ کے سربراہ گھر روانہ ہو گئے،اسپتال ذرائع کے مطابق سابق وزیر داخلہ کوڈاکٹروں نے مکمل بیڈ ریسٹ،تجویز دوائیں باقاعدہ سے استعمال کرنے کی ہدایت کی۔

عوامی مسلم لیگ کے سربراہ کو گزشتہ شب سینے میں تکلیف کے باعث راولپنڈی انسٹیٹیوٹ آف کارڈیالوجی منتقل کیا گیا تھا جہاں ابتدائی طبی معائنہ کے بعد انھیں ڈاکٹروں کی نگرانی میں رکھا گیا تھا،اس دوران ای سی جی سمیت انکے مختلف ٹیسٹ لئے گئےجبکہ مشین کے ذریعے دل کی مختلف ریڈنگز بھی ریکارڈ کی گئی تھیں،جنکا معائنہ کرنے کے بعد سینئر ڈاکٹرانکے علاج کے حوالے سے حتمی رائے قائم کریں گے۔