لاہور: ویڈیو شوٹ کرنے کے لیے ٹک ٹاکر کی فائرنگ، گولی گلی میں موجود لڑکے کی گردن میں لگ گئی

ٹک ٹاکر کا شوق اور لاپروائی نے ایک معصوم بچے کی زندگی کو داؤ پر لگا دیا۔

لاہور کے علاقے اکبری گیٹ میں ٹک ٹاکر واصف نے ویڈیو بنانے کے لیے گلی میں فائرنگ کی، فائر 14 سالہ زونیر کی گردن میں جا لگا۔

اکبری گیٹ پولیس نے کاروائی کرتے واقعہ کے مرکزی ملزم واصف کو چند گھنٹے کے اندرگرفتار کر کے اسلحہ برآمد کر لیا۔

پولیس ذرائع کا کہنا ہے کہ ملزم کے بارے میں معلوم ہوا کہ وہ اکثر و بیشتر گاڑی میں سوار لاہور کی سڑکوں پر ہوائی فائرنگ کرتا رہتا تھا۔

ایس پی سٹی کا کہنا ہے کہ اکبری گیٹ پولیس نے ملزم کو گرفتار کر کے اقدام قتل کا مقدمہ درج کر لیا تفتیش جاری ہے۔

ایس پی سٹی کیپٹن ریٹائرڈ قاضی علی رضا نے اکبری گیٹ پولیس کی کامیاب کاروائی پر ایس ایچ او اور ٹیم کو شاباش دی۔

ایس پی سٹی کا کہنا ہے کہ ہوائی فائرنگ اور اسلحہ کی نمائش کرنے والوں کو فوری گرفتار کیا جا رہا ہے۔