عمران خان قومی اسمبلی کے 3 حلقوں سے الیکشن لڑیں گے

پاکستان تحریک انصاف (پی ٹی آئی) کے وکیل بیرسٹر علی ظفر کا کہنا ہے کہ عمران خان تین حلقوں سے الیکشن لڑیں گے۔

راولپنڈی میں میڈیا سے گفتگو کرتے ہوئے بیرسٹر علی ظفر نے کہا کہ کاغذات نامزدگی جمع کرانے سے روکنا جمہوری عمل نہیں ہے،عمران خان 3 حلقوں سے الیکشن لڑیں گے۔

بیرسٹر علی ظفر نے کہا کہ کارکنوں کو ہدایات کردی گئی ہیں کہ اپنے کاغذات فائل کر دیں، امیدواروں کیلئے جیل میں موجود پی ٹی آئی رہنماؤں کو ترجیح دی جائے گی۔

اس موقع چئیرمین پی ٹی آئی بیرسٹر گوہر علی خان نے کہا کہ ہم آٹھ فروری کو ہر صورت میں الیکشن چاہتے ہیں، انشاءاللہ پارٹی ٹکٹ کا فیصلہ جلد ہوجائے گا۔

قبل ازیں، اڈیالہ جیل آمد پر بیرسٹر گوہر سے صحافی نے سوال کیا کہ پاکستان بار کونسل کی الیکشن کمشنر کو ہٹانے کی تجویز پر آپ کا کیا مؤقف ہے؟

جس پر انہوں نے جواب دیا کہ پولیٹیکل اسٹیج ہے ہم چاہ رہے ہیں الیکشن ہوں۔

بیرسٹر گوہر نے کہا کہ ہم چاہتے ہیں ایسا کوئی اقدام نہ ہو جس سے الیکشن میں تاخیر ہو، میں کہتا ہوں ہمیں الیکشن کی طرف جانا چاہئیے۔