شرح سود 22 فیصد پر برقرار رکھنے کا فیصلہ، مارچ میں مہنگائی میں کمی متوقع ہے، گورنر سٹیٹ بینک

اسٹیٹ بینک کی مانیٹری پالیسی کمیٹی نے شرح سود 22 فیصد پر برقرار رکھنے کا فیصلہ کیا ہے۔

اسٹیٹ بینک آف پاکستان میں پریس کانفرنس کرتے ہوئے گورنر اسٹیٹ بینک جمیل احمد نے کہا کہ افراط زر کو مدنظر رکھتے ہوئے شرح سود کو برقرار رکھنے کا فیصلہ کیا گیا ہے، گورنر اسٹیٹ بینک نے بتایا کہ اس سال افراط زر 23 سے 25 فیصد تک رہنے کا امکان ہے۔جی ڈی پی گروتھ کی شرح 2.3 فیصد تک رہے گی۔

انہوں نے کہا کہ سخت مانیٹری پالیسی سے مہنگائی کنٹرول کرنے کی کوشش کی جاتی ہے،کائیبور کے ریٹ کافی نیچے آگئے ہیں ، مارچ سے مہنگائی میں کمی متوقع ہے۔

انہوں نے بتایا کہ بینکس کے ڈیپازٹس میں اصافہ ہورہا ہے، کرنسی سرکولیشن 9 ٹریلین سے کم ہوکر 8.6 ٹریلین ہوگئی ہے، چار سو ارب کی کمی سخت مانیٹری پالیسی کے باعث ہوئی ہے۔

گورنر اسٹیٹ بینک کا کہنا تھا کہ چھ ماہ کے دوران معاشی صورتحال پہلے سے بہتر ہوئی ہے،آئی ایم ایف سے 1.90 ارب ڈالرز آئے ہیں ، بیرونی قرضوں میں بھی کمی واقع ہوئی ہے، اگلے چھ ماہ کے دوران پاکستان نے 5 ارب ڈالرز کی ادائیگی کرنی ہے۔