اسلام آباد ہائیکورٹ نے ایف آئی اے کو علیمہ خان کے خلاف کسی بھی کارروائی سے روک دیا

اسلام آباد ہائی کورٹ نے ایف آئی اے کو آئیندہ سماعت تک علیمہ خان کے خلاف کاروائی سے روک دیا،ایف آئی اے سائبر کرائم اور انسداد دہشت گردی ونگ نے علیمہ خان کو الگ الگ نوٹسز جاری کیے تھے۔

علیمہ خان کی ایف آئی اے نوٹسز کے خلاف دو درخواستوں پر سماعت چیف جسٹس عامر فاروق نے کی۔ علیمہ خان کی جانب سے وکیل شیراز رانجھا ایڈوکیٹ عدالت میں پیش ہوئے۔

ایف آئی اے سائبر کرائم اور انسداد دہشت گردی ونگ نے الگ الگ نوٹسز جاری کیے تھے، ہائیکورٹ نے ایف آئی اے کو کسی بھی کارروائی سے روکتے ہوئے کیس کی مزید سماعت اگلے ہفتے تک ملتوی کردی۔

علیمہ خان نے ایف آئی اے کے نوٹسز کے خلاف دو درخواستیں دائر کرتے ہوئے آج ہی سماعت کی درخواست کی تھی،درخواستوں میں استدعا کی گئی تھی کہ ایف آئی اے سائبر کرائم اور انسداد دہشتگری ونگ کی طرف سے جاری نوٹسز معطل کئے جائیں۔

درخواستوں میں کہا گیا کہ ایف آئی اے سائبر کرائم اور انسداد دہشتگری ونگ کی طرف سے الگ الگ نوٹسز جاری کئے گئے،دو فرروی کو جاری کئے گئے نوٹسز معطل کرکے متعلقہ ریکارڈ طلب کیا جائے،عدالت فریقین کو انکوائری سے متعلق شواہد بھی پیش کرنے کا حکم دے۔

درخواستوں میں کہا گیا کہ بتایا جائے کہ کن الزامات اور شواہد کے تحت نوٹسز جاری کئے گئے تاکہ درخواست گزار کو قانونی دفاع کا حق مل سکے۔