تونسہ میں پولیس چوکی پر دہشتگردوں کا حملہ پسپا، 7 پولیس جوان زخمی

کالعدم تنظیم کے دہشتگردوں نے دو ماہ بعد ایک بار پھر تونسہ میں جھنگی (حضرت عمر فاروق) پولیس چیک پوسٹ پر حملہ کیا، پنجاب پولیس کے پہلے سے الرٹ  جوانوں نے تین گھنٹے بہادری سے لڑتے ہوئے دہشتگردوں کا حملہ ایک بار پھر پسپا بنا دیا،دہشت گرد جھنگی پولیس چیک پوسٹ پر قبضہ، تعینات اہلکاروں کو یرغمال بنانا چاہتے تھے۔

ترجمان پنجاب پولیس کے مطابق 15 سے 20 دہشت گردوں نے رات کی تاریکی کا فائدہ اٹھا کر  مختلف اطراف سے شدید حملہ کیا، دہشت گرد جھنگی پولیس چیک پوسٹ پر قبضہ اور تعینات اہلکاروں کو یرغمال بنانا چاہتے تھے۔

دہشتگردوں نے حملے میں راکٹ لانچرز، ہینڈ گرینڈ، لیزر لائٹ گنز سمیت جدید اسلحہ استعمال کیا، پولیس جوانوں کی زبردست مزاحمت اور ایمونیشن ختم ہونے پر دہشتگرد بھاگنے پر مجبور ہوئے۔

آئی جی پنجاب ڈاکٹر عثمان انورنے کہا کہ آر پی او ڈیرہ غازی خان اور ڈی پی ڈیرہ غازی خان  حملہ کی اطلاع ملتے ہی مزید کمک لے کر موقع پر پہنچے، پنجاب پولیس الرٹ ہے، دہشتگردوں کو کبھی ان کے مذموم عزائم میں کامیاب نہیں ہونے دیں گے۔

آئی جی پنجاب نے کہا کہ جھنگی چوکی پر تعینات 7 جوان بہادری سے لڑتے ہوئے زخمی ہوئے، ڈسٹرکٹ پولیس، ایلیٹ ایس او یو کے جوانوں نے بھرپور جواب دیا،زخمیوں میں اے ایس آئی عمران، کانسٹیبلز محمد عامر، عاشق زین، رحمت اللہ، ثنا اللہ، ایلیٹ کانسٹیبل طارق شامل ہیں۔ شدید زخمی ایلیٹ کانسٹیبل شاہد منظور کو علاج معالجے کیلئے نشتر ہسپتال ملتان منتقل کر دیا گیا۔

ترجمان پنجاب پولیس کا کہنا ہے کہ آر پی او ڈی جی خان اور ڈی پی او ڈی جی خان نے 2 روز قبل چوکی کا دورہ کیا، تعینات نفری کو حملہ کے ٹھریٹ سے آگاہ کیا اور دفاعی اقدامات کی ریہرسل کروائی تھی۔

آر پی او ڈی جی خان کا کہنا ہے کہ جھنگی چوکی کو اضافی نفری، ضروری آلات اور اسلحہ بھی پہلے ہی فراہم کر دیا گیا تھا، انچارج چوکی جھنگی سب انسپکٹر محی الدین نے اپنی نفری کے ساتھ چیک پوسٹ کا بہترین دفاع کیا۔

آئی جی پنجاب نے جھنگی چوکی پر تعینات پولیس جوانوں کو پوسٹ کا کامیابی سے دفاع کرنے پر شاباش دی ہے،آئی جی پنجاب نے آر پی او اور ڈی پی او ڈی جی خان کو زخمی پولیس افسروں اور اہلکاروں کو علاج معالجے کی بہترین سہولیات کی فراہمی کی ہدایت کی۔