75 سال بعد جیل کلچر تبدیل،قیدیوں کو سرجھکانے، جوتے اتارنے پر مجبور نہیں کیا جائے گا، آئی جی جیل کا حکم

انگریز دور کا جیل کلچر تبدیل کرنے کے لیے آئی جی جیل خانہ جات پنجاب میاں فاروق نذیر نے مراسلہ جاری کردیا۔

جیل میں دورہ کے دوران  سپرنٹنڈنٹ کے سامنے قیدیوں کو سرجھکانا،جوتے اتارنا اور زمین پر بیٹھنا پڑتا تھا،آئی جی جیل پنجاب نے اس کلچر کو ختم کرنے کا حکم دیا ہے۔

آئی جی جیل خانہ جات کے مراسلے میں کہا گیا کہ اعلیٰ حکام کے دورہ کے دوران قیدیوں کو زمین پر بٹھانے کی بجائے بنچ فراہم کئے جائیں، سپرنٹنڈنٹ جیل، ڈپٹی سپرنٹنڈنٹ اور دیگر اعلیٰ شخصیات کے دورے کے دوران کوئی بھی قیدی اپنا سر نہیں جھکائے گا۔

مراسلہ میں کہا گیا کہ سپرنٹنڈنٹ جیل کے سامنے پیشی کے عمل کے دوران قیدیوں کو جوتے اتارنے پر مجبور نہیں کیا جائے گا۔ تمام جیل سپرنٹنڈنٹس غیر انسانی سلوک ختم کرنے کے لئے دورہ کی ویڈیوز اور تصاویر ہفتہ وار ریکارڈ کریں گے۔

مراسلہ میں کہا گیا کہ ویڈیوز اور تصاویرہفتہ میں کم از کم ایک بار آئی جی جیل کوشئیر کی جائیں گی۔