وزیراعظم کا شینزن میں ون سٹاپ سروسز اور ایگزیبیشن میوزیم کا دورہ

وزیرِ اعظم محمد شہباز شریف نے شینزن میں نانشان ون اسٹاپ سروسز سینٹر اور شینزن ایگزیبیشن میوزیم کا دورہ کیا اور موقع پر ہی وفاقی وزراء اور متعلقہ پاکستانی حکام کو آج ہی نانشان ون اسٹاپ سروسز سینٹر کے ساتھ مذاکرات کرکے پاکستان میں ایسے جدید نظام کے قیام کے لئے لائحہ عمل کو حتمی شکل دینے کی ہدایت کردی۔

بدھ کو وزیر اعظم آفس کے میڈیا ونگ سے جاری بیان کے مطابق نانشان ون اسٹاپ سروسز سینٹر پہنچے پر شینزن نانشان ڈسٹرکٹ پیپلز گورنمنٹ کی پارٹی لیڈرشپ گورنمنٹ کی رکن اور ڈپٹی مئیر لی زنہا نے وزیر اعظم کا استقبال کیا۔نانشان ون اسٹاپ سروسز کے دورے کے دوران وزیرِ اعظم کو کمپنیوں کی ایک ہی چھت تلے رجسٹریشن اور دیگر کارروائی کے حوالے سے ڈیجیٹل نظام پر تفصیلی بریفنگ دی گئی۔وزیرِ اعظم نے نانشان ون اسٹاپ سروسز میں کمپنی اور کاروبار کی رجسٹریشن کے لئے جدید نظام کی تعریف کی۔

وزیرِ اعظم نے وزیر مملکت انفارمیشن ٹیکنالوجی شزہ فاطمہ خواجہ، سیکرٹری انفارمیشن ٹیکنالوجی و دیگر متعلقہ حکام کو پاکستان میں ایسا نظام متعارف کرنے کے لئے فوری طور پر نانشنان ون اسٹاپ سروسز کے حکام سے مذاکرات کرنے کی ہدایت کی اور انہوں نے چینی تعاون سے پاکستان میں فوری طور پر ایسے سینٹر کے قیام کے لئے پاکستانی حکام کو ضروری اقدامات کرنے کی ہدایت کردی۔

وزیرِ اعظم نے پاکستانی حکام کو شہریوں کو بنیادی سہولیات فراہم کرنے کے لئےایسا ہی جدید اور تیز تر نظام متعارف کرانے کی ہدایات بھی دیں۔وزیرِ اعظم نے شینزن کے ارتقاء و ترقی کے حوالے سے قائم شینزن ایگزیبیشن میوزیم کا بھی دورہ کیا۔دورے کے دوران وزیرِ اعظم کو شینزن کی ترقی بارے تفصیلی بریفنگ دی گئی۔وزیرِ اعظم نے میوزیم کے مختلف حصوں کا دورہ کیا اور شینزن کے قلیل مدت میں ترقی کے سفر کی تعریف کی۔