لاہور ہائیکورٹ نے دھواں چھوڑنے والی گاڑیاں بند کر نے کا حکم دے دیا

لاہور ہائیکورٹ نے دھواں چھوڑنے والی گاڑیوں کو بند کرنے کا حکم دے دیا جبکہ موٹر وے پولیس کو آگ لگانے کے واقعات پر کاروائیاں کی ہدایت کی ہے.

لاہور ہائیکورٹ کے جسٹس شاہد کریم نے سموگ کے تدارک کیلئے موثر اقدامات نہ کرنے کیخلاف درخواستوں پر سماعت کی. عدالت نے ٹریفک پولیس کو ہدایت کی کہ دھواں چھوڑنے والی گاڑیوں کے خلاف کارروائی کی جائے اور دھواں چھوڑنے والی گاڑیوں کو بند کر دیا جائے.

عدالت نے یہ بھی باور کرایا کہ موٹر وے کے گردونواح میں آگ کے واقعات زیادہ ہوتے ہیں جن پر قابو پایا جائے. عدالت نے واضح کیا کہ آئی جی موٹر وے عدالتی احکامات پر عملدرآمد کرائے ورنہ توہین عدالت کی کارروائی ہوگی۔

سماعت کے دوران ہیٹ اسٹروک کے بارے میں پی ڈی ایم اے کی رپورٹ عدالت میں پیش کی گئی جس میں بتایا گیا کہ ہیٹ اسٹروک کے بارے میں آگاہی مہم شروع کردی گئی ہے. رپورٹ کے مطابق چولستان میں 20 واٹر بوزر بھیج دیئے گئے ہیں اور ایک واٹر بوزر میں 12 ہزار پانچ سو لیٹر پانی ہوتا ہے جو وہاں کے رہائشیوں کو دیا جارہا ہے. درخواستوں پر مزید سماعت 28 جون کو ہوگی.