ہمارے ایم این اے امیر سلطان کو اغوا کیا گیا، اسد قیصر

تحریکِ انصاف کے رہنما اسد قیصر نے کہا ہے کہ پتہ چلا ہے کہ ہمارے ایم این اے امیر سلطان کو اغواء کیا گیا ہے۔

اپنے ایک بیان میں انہوں نے کہا کہ کیا یہ ملک ایسے چلے گا کہ لوگوں کی وفاداریاں تبدیل کی جائیں گی؟ ملک میں جنگل کا قانون ہے، عدلیہ کی کوئی عزت و تکریم نہیں رہی.

سابق اسپیکر اسد قیصر نے کہا کہ عدلیہ کے فیصلوں کے خلاف کھلم کھلا بغاوت ہے، کیا یہ زور زبردستی سے آپ حکومت چلا سکیں گے، ہم پاکستانی ہیں اور ہم قانون اور آئین کے اندر رہتے ہوئے اپنی جدوجہد کریں گے۔

انہوں نے کہا کہ اب مذمت کا وقت ختم ہو گیا ہے، اب مزاحمت کریں گے، ہمارا پہلا مطالبہ ہے کہ ہمارے ایم این ایز کو اپنا فیصلہ کرنے دیا جائے، ایم این اے امیر سلطان کو فوری طور پر رہا کریں۔

اسد قیصر نے یہ بھی کہا کہ سپریم کورٹ اور اعلیٰ عدلیہ سے ملتمس ہوں کہ الیکشن ٹربیونل جلد از جلد فیصلے کریں، فارم 45 کے مطابق جو لوگ منتخب ہوئے ہیں ان کو ان کا حق دیا جائے۔