چین، سعودی عرب اور متحدہ عرب امارات نے پاکستان کو قرضے رول اوور کرنے کی یقین دہانی کرادی

آئی ایم ایف کے ایگزیکٹو بورڈ اجلاس سے قرض منظوری کے لیے فنانسنگ گیپ پورا کرنے میں حکومت کو اہم کامیابی ملی ہے، پاکستان کو 3سال میں 3سے5 ارب ڈالرتک کے فنانسنگ گیپ کا سامنا ہے۔

وزارت خزانہ حکام کا کہنا ہے کہ چین، سعودیہ اور یو اے ای نے قرض کی مدت میں توسیع کی یقین دہانی کرا دی ہے،رواں سال دوست ممالک کو 12 ارب ڈالر کی ادائیگیاں کرنی ہیں، پاکستان کےذمہ سعودی عرب کا 5 ارب ڈالر کا قرض واجب الادا ہے۔

حکام کے مطابق چین کا4 ارب اور متحدہ عرب امارات کا 3 ارب ڈالر قرض واجب الادا ہے،پاکستان نے چین سے پاور پلانٹس کے لیے بھی قرض میں ریلیف کی درخواست کی ہے۔

چین، سعودی عرب اور متحدہ عرب امارات کی جانب سے قرض کی مدت میں توسیع کے بعد آئی ایم ایف معاہدے میں تمام رکاوٹیں دور ہو گئی ہیں۔
آئی ایم ایف کے ایگزیکٹو بورڈ کا اجلاس رواں ماہ کے آخر میں متوقع ہے،آئی ایم ایف بورڈ پاکستان کیلئے 37 ماہ کے 7 ارب ڈالرکےقرض پروگرام کی حتمی منظوری دے گا۔