فرح گوگی کے بچوں کے نام پاسپورٹ کنٹرول لسٹ سے نکالنے کا تفصیلی فیصلہ جاری

لاہور ہائیکورٹ نے  نے فرح خان کے بچوں کا نام پاسپوٹ کنٹرول لسٹ سے نکالنے  کا تفصیلی فیصلہ جاری کردیا اور قرار دیا کہ بچوں کا نام لسٹ میں رکھنے کا کوئی جواز نہیں ہے۔

لاہور ہائیکورٹ کے جسٹس انوار الحق پنوں کی سربراہی میں دو رکنی بنچ نے 9 صفحات پر مشتمل فیصلہ جاری کیا۔ درخواست کی پیروی محمد اظہر صدیق ایڈووکیٹ نے کی۔

دو رکنی بنچ نے قرار دیا کہ حکومتی وکیل بچوں کا نام پاسپورٹ کنٹرول لسٹ میں رکھنے پر عدالت کو مطمئن نہیں کرسکے۔ فیصلے میں بتایا گیا کہ بچوں کی والدہ فرح خان سمیت دیگر پر اینٹی کرپشن نے مقدمہ درج کیا اور فرح خان نے انوسٹیگیشن جوائن نہیں کی۔

عدالت نے فیصلے میں باور کرایا کہ فرح خان پر جب مقدمہ درج کیا گیا اس وقت دونوں بچوں کی عمریں سولہ سال سے کم تھی۔ فیصلے  میں شہباز شریف کا نام ای سی ایل سے نکالنے کے فیصلے کا ذکر کیا۔

دو رکنی بنچ نے اپیل کو منظور کرتے ہوئے سنگل بینچ کا فیصلہ کالعدم قرار دے دیا۔فرح خان کے بچوں ایمان جمیل اور فراز اقبال نے سنگل بینچ کے فیصلے کے خلاف اپیل دائر کی تھی۔