پشاور ائیرپورٹ پر سراغ رساں کتے کی مدد سے منشیات سمگلنگ کی کوشش ناکام بنادی گئی

اینٹی نارکوٹکس فورس کے یونٹ میں شامل سراغ رساں کتے نے باچا خان انٹرنیشنل ائیرپورٹ پر سفری بیگ کے ذریعے ہیروئن اسمگل کرنے کی کوشش ناکام بنادی۔

ترجمان کے مطابق اے این ایف کا منشیات اسمگلنگ کے خلاف کاروائیوں کا سلسلہ جاری ہے،اے این ایف کی سراغ رساں کتے کی مدد سے منشیات اسمگلنگ کے خلاف ایک اور اہم کامیابی سر کی،باچا خان انٹرنیشنل ایئرپورٹ پر کوہستان کے رہائشی مسافر کو گرفتار کرلیا گیا،سراغ رساں کتے نے ملزم کا بیگ سونگھ کر منشیات موجودگی کی نشاندہی کی۔

دوران تلاشی بیگ کی تہہ میں مہارت کے ساتھ چھپائی گئی 2 کلو 220 گرام آئس برآمد ہوئی،مُلزم پرواز نمبر GF-785 کے ذریعے بحرین کے لئے روانہ ہو رہا تھا،ملزم کے خلاف انسدادِمنشیات ایکٹ کے تحت مقدمہ درج کرلیا گیا۔

ایک دوسری کارروائی کے دوران دینہ میں واقع کوریئر آفس میں پارسل سے 1 کلو 590 گرام ہیروئن برآمد کی گئی،ہیروئن ڈنر سیٹ کے کارٹن میں مہارت کے ساتھ چھپا کر برطانیہ اسمگل کی جا رہی تھی،پارسل پونچھ (آزاد کشمیر) کے رہائشی کی جانب سے بک کروایا گیا تھا۔

منشیات قبضے میں لیکر مزید تحقیقات کا آغاز کر دیا گیا ہے۔