چینی وافر لیکن ریٹ ملز مالکان کی مرضی کا، پنجاب حکومت 140 روپے کلو خرید کر عوام کو دے گی

شوگر مل مالکان اپنی مرضی کا چینی کا ریٹ فکس کرانے میں کامیاب ہو گئے، پنجاب حکومت کو 140 روپے کلو چینی فروخت کریں گے۔

پنجاب حکومت اورشوگر ملز مالکان کے درمیان چینی کی قیمت پر مسلسل تین روز سے جاری مذاکرات میں طے پایا ہے کہ اب شوگر ملز مالکان پنجاب حکومت کو 140روپے فی کلو چینی فروخت کریں گے۔ پنجاب حکومت عوام کو ریلیف دینے کے لیے سینٹرز، ماڈل بازاروں اور اتوار بازاروں میں خصوصی سٹالز پر چینی فروخت کرے گی۔

محسن نقوی نے اپنے بیان میں کہا کہ عوام کی مشکلات کا پورا احساس ہے اور چینی کی قیمتوں میں کمی کا فائدہ براہ راست صوبے کے عوام کو ہوگا۔

واضح رہے کہ اس سے قبل نگراں وزیر اعلیٰ پنجاب محسن نقوی سے شوگر ملز مالکان کے وفد نے ملاقات کی ہے۔ ملاقات میں کرشنگ سیزن 28 اکتوبر سے شروع کرنے پر اتفاق کیا گیا۔

شوگر ملزمالکان کے وفد نے وزیراعلیٰ محسن نقوی کو بریفنگ میں بتایا کہ پنجاب میں ضرورت سے زیادہ چینی موجود ہے۔

شوگر ملزمالکان کے وفد میں ہارون اختر، ذکا اشرف، فواد مختار اور دیگر شامل تھے۔ صوبائی وزیر صنعت ایس ایم تنویر اور چیف سیکریٹری زاہد اختر زمان بھی اس موقع پر موجود تھے