علی امین گنڈاپور اسلام آباد پر چڑھائی سے پہلے آئین پڑھ لیں، گورنر خیبرپختونخوا

گورنر خیبر پختونخوا فیصل کریم کنڈی نے کہا ہے کہ وزیر اعلیٰ خیبر پختونخوا علی امین گنڈاپور اسلام آباد پر حملہ آور ہونے سے قبل آئین پڑھ لیں،چاہتے ہیں کہ صوبہ ترقی کرے لیکن اگر کوئی قانون ہاتھ میں لیگا تو ماضی میں بھی ہم نے اسلام آباد کی سڑکوں پر لوگوں کو بھاگتے ہوئے دیکھا ہے۔

کراچی میں مزار قائد پر حاضری دینے کے بعد میڈیا سے گفتگو کرتے ہوئے گورنر خیبر پختونخوا فیصل کریم کنڈی نے کہا کہ میں بطور گورنر اسلام آباد اور خیبر پختونخوا کے درمیان پل کا کردار ادا کرونگا، صوبے کے مسائل کےلئے پلیٹ فارم موجود ہے تمام مسائل آئینی طریقے سے حل ہونگے۔

فیصل کریم کنڈی نے کہا کہ علی امین گنڈاپور کو اسلام آباد پر حملہ آور ہونے سے قبل آئین پڑھ لینا چاہیے،اگر کوئی اس طرح کریگا تو ان سے قانونی طریقے سے نمٹا جائیگا۔

گورنر خیبر پختونخوا نے ایک سوال کے جواب میں کہا کہ سب سے پہلے ترجیح صوبے میں امن و امان ہے ہمیں دہشت گردی کے خلاف جنگ میں افواج پاکستان اور اداروں کا ساتھ دینا ہوگا۔