نئی یونیورسٹیوں کے قیام کے تمام بلز کا دوبارہ جائزہ لیا جائے گا، وفاقی وزیر قانون

وفاقی وزیر قانون اعظم نذیر تارڑ نے نئی یونیورسٹیوں کے قیام سے متعلق بل قائمہ کمیٹیوں کو بھجوانے کا اعلان کیا۔

قومی اسمبلی اور سینیٹ میں نئی یونیورسٹیوں کے قیام کے 12 بل پیش کئے گئے تھے جس پر ارکان نے اعتراض اٹھایا تھا اور کہا تھا کہ نئی یونیورسٹیوں کے اندھا دھند قیام کی بجائے معیار تعلیم کی بہتری پر توجہ دی جائے۔

وفاقی وزیر قانون اعظم نذیر تارڑ نے سینیٹ اجلاس میں اس معاملے کی وضاحت کرتے ہوئے کہا کہ یونیورسٹیوں کے تمام بل کمیٹیوں کو بھیجے جائیں گے،یونیورسٹیوں کے قیام سے متعلق بلز کا جائزہ لیا جائیگا۔

وزیرقانون نے کہا کہ وزیراعظم اور وزیر تعلیم نے تمام بلز کا جائزہ لینے کا کہا ہے۔

وزیرقانون نے کہا کہ این ایل سی  1979میں جنرل ضیا کے حکم سے بنا تھا،این ایل سی ایک سیل ہے، بحث تھی، اسے وفاق کے ماتحت کیاجائے، بل کے ذریعے این ایل سی کو وفاقی حکومت کے ماتحت کیا گیا ہے۔

وزیر قانون نے ایک اور وضاحت کی کہ صرف قدرتی آفات میں ٹیکس استثنٰی ہوگا، باقی ٹیکس ادا کرنا ہوگا۔