امریکا ایف 16 طیاروں کا وعدہ پورا کرے، ہم سویڈن کی نیٹو رکنیت کی توثیق کردیں گے، صدر اردوان

صدر رجب طیب اردوان نے کہا ہے کہ اگر امریکی صدر جو بائیڈن کی انتظامیہ انقرہ کو ایف سولہ جیٹ طیاروں کی فروخت کی راہ ہموار کرتی ہے تو ترکی کی پارلیمنٹ سویڈن کی نیٹو بولی کی توثیق کرنے کے اپنے وعدے پر عمل کرے گی۔

ترک میڈیا کے مطابق آذربائیجان سے واپسی پر نامہ نگاروں سے بات کرتے ہوئے اردگان نے کہا کہ وزیر خارجہ ہاکان فیدان اور امریکی وزیر خارجہ انٹونی بلنکن نے گزشتہ ہفتے نیویارک میں سویڈن کی نیٹو کی رکنیت کی کوشش پر تبادلہ خیال کیا۔

اردگان نے کہا کہ امریکی انتظامیہ ترکی کو ایف سولہ لڑاکا طیاروں کی فروخت کو انقرہ کی طرف سے سویڈن کی توثیق سے جوڑ رہی ہے۔

انہوں نے کہا کہ اگر وہ (امریکہ) اپنے وعدوں پر قائم رہے تو ہماری پارلیمنٹ بھی اپنا وعدہ پورا کرے گی۔ سویڈن کی نیٹو کی رکنیت کے بارے میں حتمی فیصلہ ترک پارلیمنٹ کا ہوگا۔