کراچی میں ڈکیتی مزاحمت پر ایک اور قتل، شہریوں نے تشدد کر کے ایک ڈاکو مار ڈالا

کراچی کے علاقے گلستان جوہر میں ڈاکوؤں کی فائرنگ سے ایک شہری ہلاک ، ایک زخمی ہوگیا، شہریوں نے ایک ڈاکو پکڑ لیا  اور تشدد کیا جس سے ڈاکو ہلاک ہوگیا۔

واقعہ ملینیم مال کے قریب پیش آیا جہاں موٹر سائیکل پر سوار دو مسلح ڈکیت شہریوں سے لوٹ مار کررہے تھے، شہری کی مزاحمت پر ڈاکوؤں نے فائرنگ کردی جس سے 38 سالہ سیعد علی رہبر جاں بحق جبکہ عرفان زخمی ہوگیا۔

ملزمان فرار ہونے لگے تو وہاں موجود  شہریوں نے ایک ڈاکو کو پکڑ لیا اور تشدد کا نشانہ بنایا،عوام کے تشدد سے ڈاکو ہلاک ہوگیا جبکہ اسکا ساتھی فرارہوگیا، واقعے پر صوبائی وزیر داخلہ ضیا لنجار نے سخت نوٹس لیتے ہوئے ایس ایچ او شاہراہ فیصل کو فوری طور پر معطل کردیا۔

انچولی امام بارگاہ میں مقتول سید علی رہبر کے والد سید اختر حسین سروش نے میڈیا سے گفتگو کرتے ہوئے کہا کہ ہم سحری کے لیے اٹھے تھے تو کال آئی کہ جناح اسپتال میں لاش آئی ہے۔

انہوں نے کہا کہ میری 70 سال عمر ہے، میرابیٹا 38 سال کا تھا، بے حسی ہے، قانون نافذ کرنے والے ادارے کہاں ہیں؟

سید اختر حسین سروش نے یہ بھی کہا کہ ہم وہ لوگ ہیں جنہوں نے پاکستان بنایا تھا، پاکستان بنانے کی خاطر ہمارے آبا و اجداد نے قربانیاں دیں، پاکستان میں رہنا سزا بنا دیا گیا ہے۔